Iha tempu agora Feto Timoroan hatudu sira nia kompetensia atu servisu hanesan mane, atu bele subsisiti vida moris lor-loron. Feto mos hatudu sira nia consiensia katak laos mane deit mak bele servisu buka osan, maibe feto mos bele.
Iha tempu uluk ita sempre hare mane deit mak servisu hamos jardin, maibe iha tempu agora maluk feto balun mos hatudu nia sira abilidade nudar feto ne’ebe maka servisu hamos jardin.
Iha tempu dader tuku 6:30 senhora ida ho naran kompleto Lucia Da Silva komesa lao husi nia uma ne’ebe maka la dok husi Jardin Mandarin, ho kameza kor-laranja ne’ebe mak nudar farda servisu, nomos kaer ho tudik kikoan ida no aisuak ida nebe maka sai fasilidade ba aktividade hamos jardin Mandarin.
Lor-loron Senhora Lucia fokit dut no hamos foer iha jardin laran. Senhora Lucia ho idade 48 anos mai husi Distritu Lospalos no inan ba oan Nain 5 (lima).
“Hau nia naran lucia Da Silva husi Lospalos. Hau servisu iha ne’e atu besik tinan ida, hau iha oan nain lima. Hau mai husi uma tuku 6:30 dader, mais tuku walu mak hau kaer servisu. Hau nia uma ladun dok husi Jardin ne’e, ne’ebe hau mai lao deit. Hau nia servisu maka fokit dut sira ne’e, nomos wainhira iha plastik ruma hau hamos tia,” dehan Senhora Lucio iha Jardin Colmera, Dili, semana kotuk (20/1).
Nudar feto nebe maka lor-lor hamos Jardin, iha mos difificudade ne’ebe mak nia hasoru, mesmu kada fulan hetan salariu hamutuk $100 maibe ba Senhora Lucia katak ne’e la sufisiente ba nesesidade lor-loron tanba nia oan nain hat eskola hotu iha eskola privada ne’ebe hasai osan maka’as. Aleinde nia selu eskola iha mos nesesidade uma laran hanesan hahan.
“Dificuldade ne’ebe mak hau hasoru ne’e, servisu ne’e todan mais iha tempu ida ladun. Hau tenki servisu duni tanba atu hare ba hau nia oan sira nia eskola nomos sira nia persija lor-loron. Hau simu osan kada fulan, ho salariu hamutuk $100, maibe la sufisiente ba nesesidade uma laran nian tanba atu selu eskola nomos aihan lor-loron nian” Lucia Hatutan, iha nia Knar Fatin semana Kotuk.
Entertantu iha mos ita nia maluk feto ida Senhora Amanda do Rego nebe maka servisu hamos Tasi ninin Lesidere, ita nia maluk feto ne’e hanesan mos ho ita nia belun Lucia, maibe area servisu mak diferente, maibe nia objectivu hanesan deit atu halo ita nia Capital Dili sai cidade nebe mak mos no fresko.
Senhora Amanda Dorego, ho tinan 50, no inan husi oan hamutuk 12, ne’ebe maka lor-loron hamos Tasi Lesidere. Wainhira iha tasi ibun iha foer ruma entaun Senhora Amanda tenki atende foer sira ne’e to’o mos. Iha aktividade ne’e nia laos servisu mesak mos servisu hamutuk ho nia kolega mane nain rua.
“Hau nia naran Amanda Dorego hela iha Bidau Lesidere, hau nia tinan agora 50, ami servisu iha ne’e ami nain fetoto tolu ida nomos mane nain rua ami nia servisu hamos tasi sira ne’e wanhira foer sae iha tasi ninin sira ne’e.”
Nudar inan nebe maka Faluk, enntaun nesesidade oansira sai responsabilidade ninian, hare ba condiasaun oan nebe mak kategoria barak, sei mosu Perguntas katak, to’o ga lae nia salariu ba nesesidade uma laran? No sufisiente ka lae?
“Fulan ida ami hetan $100. Osan ne’e la to’o tan, labarik hira mak eskola, no atu hola fali fos, modo no sira seluk. Ossan $100 ne’e la to’o tanba nesesidade aas liu fali salariu nebe maka hau hetan. Dificuldade ne’ebe ami hasoru maka wainhira rai manas ne’e ami para oituan tanba kadabes ulun moras, no ida seluk foer barak,” dehan Senhora Amanda.
