Diretor Ezekutivu Judisial System Monitoring Program (JSMP) Luis de Oliveira Sampaio hateten, JSMP halo planu husi 2010 to’o 2015 atu nafatin continua halo monitorizasaun ba iha Tribunal, halo observasaun iha Parlamentu Nasional inklui fo apoiu ba vitima Violensia Domestika, Violensia Sexual ou violensia bazea ba jeneru nian nomos mobiliza apoiu publiku.
“Ami iha balu dehan planu estratejiku durante tinan lima ninian, ami defini ona 2010 to’o 2015 iha planu estratejiku ne’e iha atividade balu nebe maka ami halo desde uluk maka continua halo monitorizasaun iha Tribunal, halo observasaun iha Parlamentu Nasional, apoiu vitima sira ba kazu violensia domestika no violensia sexual,” dehan Luis de Oliveira Sampaio, Diretor JSMP, semana kotuk (17/01) iha Colmera Dili.
Nia hatutan, JSMP mos mobilize apoiu publiku, halo audiensia ho institusaun relevante, institusan estadu, halo audiensia ho Ministeriu Justisa, halo audensia ho Tribunal Rekursu nomos ho Presidente da Republica.
“Atu introdus ami nia papel servisu nian ba ita nian Orgaun Ezekutivu mos iha tempu hanesan atu incoraja sira hanesan Autoridade Estadu, no orgaun Governu nebe mak dala barak liu iha kompetensia bo’ot atu hatama liman ba setor justisa atu sira mantein sira nia posisaun atu respeita funsionamentu setor justisa,”nia katak.
Iha oportunidade hanesan, Ana Paula Marcal, Staf Monitoring Tribunal Unidade Peskiza Legal hateten iha 2012 ne’e halo monitorizasaun ba iha Tribuna iha Distritu 4 hanesan Tribunal Distrital Dili, Tribunal Distrital Baucau, Tribubal Distrital Oe-Cusse nomos iha Tribunal Distrital Suai.
“ Iha neba ami nia servisu mak lor-loron ba iha Tribunal, iha dader no lokraik e ami atu hare oinsa halo julgamentu nebe justu, lalais, no baratu tuir lei ga lae,”nia informa.
Nia afirma, kona ba julgamentu JSMP mos tenki hare jeral iha tribunal, saida maka akuntese, nomos oinsa atendementu husi defesa sira karik protes ba iha julgamentu ou audiensia laran sira kolia ona ho sira nia kliente ga lae’e, nomos wainhira iha julgamentu juis sira fo tempu ba defesa sira gala’e, wainhira kuandu prosesu ne’e maka aplica duni antaun ne’e maka dehan julgamentu nebe maka Justu, bratu, no lalais.
