Prezidente Grupu Feto Parlamentar Timor-leste (GMPTL) Josefa Alvares Soares hateten atu proteze no regula ema individual ou organizasaun ruma atu labele fa’an ema ka lori droga tama mai Timor, presiza kria lei trafiku umanu e draft lei ne’e rasik agora iha hela prosesu aprovasaun husi governu.
“Sim ami servisu hamutuk ho Ministerio Negosiu Estranjeiru e draft ne’e iha ona hein deit aprovasaun husi governu, bainhira governu haruka mai konserteza parlamentu define ida ne’ebe mak
improtante liu bele ajenda ona iha parlamentu nasional tanba ami iha tiha ona esplikasaun, enkontru entre parserias,”hateten Prezidente GMPTL, Josefa Alvares Soares, semana kotuk (13/01) iha Parlamentu Nasional.
Tuir nia, Timor-leste asina ona Konvensaun Direitus Umanu kona ba Trafiku Umanu nian e bazea ba ida ne’e GMPTL hakarak atu kria lei spesifiku ida kona ba trafiku umanu nian nune’e bele regula ema sira ne’ebe hakarak fa’an ema seluk.
Nia hatutan se lei ne’e iha bele proteze ema individual ou organizasaun ne’ebe foti ema atu halo explorasaun ba ema nia forsa hanesan ema nia orgaun liu –liu orgaun seksual atu hetan benifisiu ba sira nia aan. No atu prevene ema sira ne’ebe hakia’ak labarik la’os diak ninian maibe labarik sira bo’ot sir abele uza labarik hodi hetan benefisiu.
Iha lidun seluk membru Rede Feto, Filomena Barros dos Reis, hateten lei trafiku umanu ne’e importante tebes ba nasaun foun hanesan Timor-Leste tanba dalabarak ema dehan kazu trafiku umanu laiha maibe na realidade trafiku umanu iha no sosiedade sivil sira aprejenta nafatin maibe ema barak la dun fiar ne’eduni parlamentu nasional liu husi GMPTL iha inisiativa atu kria mos lei ne’e inisiativa ne’ebe diak tebes.
“Se grupu mulher parlamentar Timor-Leste propoin ba lei ida ne’e ami sosiedade sivil agradese tebes diak liu iha lei ne’e lalais atu bele minimize kazu trafiku umanu no salva lalais ita nia ema husi hanoin at sira ne’ebe iha duke laiha,” nia sujere.
