Diretor Fundasaun Mahein (FM) Nelson Belo hateten, iha 2012 ne’e FM sei halo monitorizasaun ba iha nivel politik iha Parlamentu Nasional liu-liu ba Comisaun B .
“Monitorizasaun ba iha nivel politik nebe liu-liu iha parlamentu nasional comisaun B hanesan sira debate kona ba orsamentu jeral nebe maka aloka ba iha siguransa, defesa, intelijen. Depois ami mos halo monitorizsaun ba iha Konselho Superior Defesa no
seguransa nian nebe maka iha Presidente Republica nia okos, iha parte seluk mos ami halo monitorizasau ba seguransa maritime, ami produs relatoriu ba iha Presidante Republica,” hateten Diretor FM Nelson Belo, semana kotuk (17/01) iha Balide Dili.
Belo hatutan, FM mos sei halo monitorizasun ba iha Polisia nia servisu iha Distritu-distritu, agora dadaun husi FM halo hela relatoriu lubuk ida kona ba iha siguransa ba iha eleisaun nian.
“Agora dadaun ami halo hela relatoriu kona ba iha seguransa ba eleisaun nian ne’e ami produs tiha ona, agora sai debate namanas iha komunidade kona ba vantajen ou desvantajen polisia no military ba votu ga lae” nia katak.
Entertantu Efrem dos Martires da Costa Guterres, Koordinator Peskiza hateten fundasaun nia servisu maka hare kona ba area defesa siguransa liu-liu halo monitoring halo peskija ba advocasia dala barak halo monitoring ba iha PNTL liu-liu hanesan agora kona elisaun jeral.
“Ami sempre ba akomphania sira nia planu nebe maka atu halo ba elisaun jeral ne’e nomos ami foti dadus ruma iha neba,” nia hateten.
Tuir nia, rezultadu husi monitorizasaun ne’e sei fo ba iha Parlamentu ho Governu tanba parlamentu ho governu maka iha kompetensia bo’ot para halo mudansa ba iha instituisan ne’e ou atu halo planu ba defesa no seguransa nian.
