Tuir observasaun TDW iha fatin atrakamentu ro pasajeirerus Berlin Nakroman iha areadores portu Dili kada Segunda no Kinta nota katak difkuldade barak maka pasajeirus hasoru waihira atu halo movimentu hosi kapital Dili ba iha Distritu Oe-Cusse no Atauro.
Tanba fatin hein nian la iha, passajeirus sira obriga aan tenke hein deit iha luron ninin ne’ebé ladun garantia siguransa ba passajeirus inklui impede movimentu transporte iha estrada oin.
Alende ne’e mos waihira pasagerus sira tama ba ro leten tenke hakat liu husi dalan ne’ebé klot tamba ekipamentu pezados tula kontainer halo hela aktividade iha portu laran.
Passajeiru husu ba governu atu konsidera sira nia situasaun.
Passajeiru Oe-cusse oan ida, Sebastiao Andrade, ne’ebé hein hela ro iha dalan ninin hateten katak sira tenke lao tuir situasaun ne’e no pasensia maski hasoru difikuldade oi-oin.
“Ne’e uniku alternativa atu ba Oe-Cusse, tenke hein iha dalan ninin. Kareta halai ba mai afeta rai rahun mai. Tristi liu tan waihira tempu udan, ami tenke halai buka fatin iha loja sira ka kantor no ai-mahon hun sira,’’ hateten passajeiru Andrade semana kotuk (19/1) iha Portu Dili nia oin.
Nia mos konta katak wainhira atu sae ro tenke lao ho kuidadu tamba sei lae kareta tula kontener bele soke malu ema.
‘’Ida tan maka ne’e, bainhira ami atu sae ro ho ta-tauk hela no hadau malu ho kareta bo-bot sira ne’e tula container, I ami tenke lao tuir kontener sira nia let.’’
Hatan ba preokupasaun hosi passejeirus Ro Berlin Nakroma, Membru Parlamentu Nasional, Deputao Arão Noe, hateten katak iha momentu governo anterior harii ona ponte-kais ba passajeirus nian ida iha Portu Dili nia sorin maibe tamba la uza tanba sedimentasaun iha parte ne’e barak liu.
“Tasi makas lori rai henek mai iha baku iha sudut ne’e hodi rai henek bou hamutuk iha portu passajeirus nia oin entaun ro la bele atraka. Tamba ne’e maka ami lamenta tebes momentu halo levantamentu ba konstruksaun portu refere. Tamba sa maka la halo identefika situasaun hanesan ne’e. Ita gasta orsamentu lubuk ida afinal ita nia pasagerus sofre bebeik,” Deputadu Noe hateten.
Deputadu Noe, hanesan mos Secretario Comisaun G, ne’ebe trata assuntu Infrastrutura no Ekipamentu Sosiais informa tan katak tuir planu Governo ba longu prazu sei muda fali Portu Dili ba fatin seluk hodi nune fatin portu ne’ebe sai fali ba portu passajeirus no turismu nian.
Bainhira TDW tenta konfirma asuntu ne’e ho Direktur Administrasaun dos Portus de Timor-Leste (APORTIL), Costantino Verdial, maibe la konsege tamba la iha fatin atu koalia ho media.
