Membru Parlamentu Nasional (PN) Deputadu David Diaz Ximenes lamenta ho kompania ne’ebe kaer projetu rehabilitasaun ba moru protesaun iha Fatu-ahi nian tanba halo fali bloku hodi halo ba estrada ne’e.
“Hau la’os enjineru konstrusaun sivil, mas sekarik ita bo’ot sira sae ba hare,halo moru protesaun atu rai labele monu tun ba iha kraik, halo fali ho bloku,la’os ida fui deit ne’e,”kestiona Deputadu David Diaz Ximenes,iha plenaria parlamentar,semana kotuk,(16/01).
Relasiona ho kestaun ne’e, Prezidenti PN, Fernando Lasama de Araujo husu ba komisaun G atu halo fiskalizasaun ba iha estrada ne’e.
“Favor ida tau matan tok ba buat ida neba,ita bele gasta osan maibe gasta ba buat nebe ita hakarak,”Lasama husu.
Iha fatin hanesan Deputadu Duarte Nunes,hafoin fila husi Lospalos mai Dili, nia parte mos hare ho matan katak,autorizasaun husi obras publika nian tau bluku ne’eba para atu tau ba besi beton.
“Tanba ne’e mak hau hanoin iha ona autorizasaun karik, tanba hau mos para iha neba hau hare,”Nunes katak.
Entretantu wainhira jornalista koko konfirma asuntu ne’e ba iha Sekretariu Estadu Obras Publika (SEOP) maibe lakonsege tanba Sekretariu Estadu laiha tempu.
