Ho limitasaun bilete ro Berlin Nakroma ho folin $4 ne’ebe hotu lalais, halo pasajeiru sira deskontente no diskunfia katak staf Administrasaun dos Portu de Timor-leste (APORTIL) fa’an subar bilete.
Serfino Berlau Sila, pasajeru Dili Oe-cusse, lamenta ho sistema fa’an bilete husi funsiunariu APORTIL tanba bilete ho folin dolar hat hotu lalais enkuantu bilete dolar 10,00 to’o 20 barak los.
‘’Hau lamenta tebes ho sistema fa’an tiket iha ne’e dolar hat nian fan oituan deit, hela tiket empat belas no dua pulu dolar nian mak barak, ne’e tanba sira fa’an fali ba sira nia kolega e dala ruma ema pesan fo sira dolar lima entaun ita mai ikus ne’e la hetan ona atu hola iha liur ne’e dolar hat nia sira fan fali dolar sanulu,” lamenta Sila semana kotuk (16/01) iha APORTIL Dili.
Tanba ne’e nia husu ba governu atu hadia sistema ne’e, nune’e pasajeiru bai-bain (kbi’it laek) sira mos bele asesu bilete ho folin baratu nian.
‘’Hau husu ba governo atu tau matan ba kestaun ida ne’e, selae ita nia inan-aman sira atu mai fila liman iha Dili la bele mai tanba sosa tiket labele no estudante sira atu ba foti osan ka hahan ruma labele ba tanba la hetan tiket dolar hat nian,’’nia sujere.
Lamentasaun hanesan hato’o mos husi Fidelio Costa katak, hahalok ida ne’e la’os foin akontese maibe desde Nakroma halo operasaun Dili- Oe-Cusse mas nunka atu resolve husi parte kompetente.
Iha parte seluk tuir Deputadu Arão Noe, katak asuntu ne’e iha Parlementu Nasional liu husi komisaun G identifika no rekomenda ona ba ministerio maibe povu sira ne’ebe maka hela iha capital ka hela besik maka jogada hodi hola bilhete barak hafoin maka fan tutan ho folin ne’ebé aás.
‘’So ke sira pasajerus Oe-Cusse oan halo jogadas halibur kartaun barak iha nia liman depois de aban nia hateten katak nia laba entaun sei maka hakarak sosa fali entau nia kustu ne’e aumenta laos deit akontese iha iha ne’e deit maibe iha Oe-Cusse mos,’’ Deputadu Noe hateten.
Tuir nia, karik manipulasaun ne’e akontese husi portu Dili, ne’e bele komete korupsaun tanba ne’e mak husu ba Aportil atu toma atensaun ba asuntu ne’e .
‘’Hau hanoin manipulasaun ne’e bele akontese iha portu Dili tanba ne’e sira tuir lolos iha sistema ida katak altura ami halo fiskalizasaun sira fa’an tiket iha fatin uniku, ema forma lori osan no kartaun eleitoral atu regista tamba ne’e mak bele husi laran maka halo jogu ho ema sira iha liur fan tiha,’’ nia katak.
Entretantu TDW koko konfirma asuntu ne’e ba iha Diretor APORTIL Constantino Verdial maibe lakonsege tanba la iha fatin atu koalia ho media.
