Tuir Prezidenti Konfederasaun Sindikatu Trabalhador Timor-leste (KSTL), Jose da Conceicao katak, oras ne’e dadauk emprezariu estranjeiru ukun ona Governu tanba sira halo trabalhador Timoroan konforme sira nia hakarak.
“Ita hare deit ema trablhador estranjeiru kuandu sira tama mai iha ne’e servisu iha emprezariu sira ne’e maioria sira nia salariu bo’ot liu fali timor nian,” preokupa Prezidente KSTL Jose da Conceicao, semana kotuk (12/01) iha Farol, Dili.
Nia parte hato’o kestaun ne’e relasiona ho Manajer Banku Mandiri Moh. Yani ne’ebe demiti funsiunariu nain 3 inklui reprezentante husi KSTL ne’ebe mos servisu iha fatin ne’e.
Nia haktuir, oras ne’e dadaun trabalhador Timor oan sai hanesan atan ba emprezariu estranjeiru maibe governu la halo buat ida.
“Signifika katak, saida, ita ukun an ona maibe relasaun industrial kona ba asuntu laboral ema estranjeiru mak ukun ita inklui Governu,” nia katak.
Tuir Prezidente KSTL da Conceicao katak durante ne’e Governu la halo buat ida hodi halo asaun hasoru emprezariu sira.
Entertantu Diretor Jeral Sekretariu Estadu Formasaun Profesional e Empregu (SEFOPE), Jacinto Baros Gusmao, hateten iha lei laboral la dehan nune’e.
“Ita iha SEFOPE tenki proteje trabalhador sira tanba ita hare katak, salariu minimu ne’ebe hateten iha lei UNTAET nian 85 Dolar,” nia dehan.
Nia dehan, komisaun mos hadia ona salariu minimu husi 85 dolares ba 145 dolares Amerikanu kada fulan ba sira ne’ebe la iha skill.
“Problema ida mak agora dadauk investor sira loke servisu iha ne’e, maibe ita nia trabalhador barak mos la hatene klaru kona ba sira nia salariu,” nia katak.
Tuir nia, ida ne’e akontese tanba trabalhador sira falta informasaun,investor estranjeiru fo servisu ba sira sein kontratu no sira nia salariu mos la tuir lei ne’ebe mak iha.
Tanba ne’e tuir nia, kona ba problema hirak ne’ebe akontese la’os governu la halo buat ida maibe tenke hare problema ho onestu bazea ba realidade ne’ebe iha.
“Ita iha lei nebe mak estabelese iha ita nia rai,ema estranjeiru mai loke bisnis iha ne’e mos ita iha lei nebe garantia nia.”
Nia dehan Governu bazeia ba lei nebe mak iha maibe dala barak trablhador sira mak la kohi halo tuir lei.
