Prezidenti Konfederasaun Sindikatu Trabalhadores Timor-leste (KSTL), Jose da Conceicao, konsidera Sekretariu Estadu ba Sekretaria Estadu Formasaun Profesional e Empregu (SEFOPE) Bendito Freitas sai porta voz ba Banku Mandiri (BM) nian kona ba kazu demitisaun funsiunariu nain 3 iha banku ne’e.
“Iha kazu ida ne’e ami hare katak governu la halo buat ida. Governu sai fali porta voz ba Muhamad Yani nian,” hateten Prezidenti KSTL Jose da Conceiçao semana kotuk (12/01) iha Farol, Dili.
Prezidenti KSTL da Conceiçao hatete razaun governu sai porta voz ba BM, katak lolos Manajer BM, Moh. Yani hato’o informasaun demitisaun ne’e direitamente ba KSTL maibe hato’o fali iha SEFOPE depois Sekretariu Estadu Freitas mak ba hato’o fali iha KSTL.
“Tanba kompania la hato’o mai ami imidiata, liu fali Sekretariu Estadu mak hato’o fali mai, signifika katak juru bicara kompania ninian mak [SE] Bendito Freitas,” nia tenik tan.
Nia haktuir tuir informasaun ne’ebe KSTL simu husi SE Freitas katak staff nain tolu hosi banku hetan demiti husi Manajer BM tanba falta loron tolu ona no tuir lei sira bele demiti husi sira nia servisu.
“Durante prosesu problema ne’e, Governu la tur iha ninia pozisaun katak, tuir lei Timor-Leste nian hanesan ne’e sira la koalia, sira rona tuir deit Muhamad Yani koalia, sira tuir deit,” nia kestiona.
Nia afirma iha dia 19 Dezembru 2011, funsiunariu sira halo greve maibe polisia halo kedas intervensaun, e pozisaun ba sira nain tolu agora, jerente hatama ona ema na’in tolu husi Indonezia. Husi parte KSTL telefone sira halo kedas inspesaun hodi identifika nia pozisaun hanesan trabalhor ka lae.
Tuir Prezident da Conceiçao husi funsiunariu nain tolu ne’ebe demiti iha 31 Novembru 2011, nain ida ofisial KSTL nian ho naran Joaquin Gonzaga, servisu ho voluntariu hodi tau matan ba direitu trabalhador sira nian iha BM.
“Hapara sem razaun ruma, maibe kompania kria fali razaun falsa katak Joaquin atu baku fali jerenti ne’e maibe evidensia la iha,” nia afirma.
Iha momentu foti razaun ida ne’e KSTL rasik foti CCTV iha kantor laran hodi hare e iha neba diskuti malu oituan tanba deit Jerenti Muhamad Yani hakarak impoin ninia hakarak.
Tanba ne’e tuir orbservasaun KSTL husi prosesu ne’e tomak katak Moh.Yani la gosta Joaquin Gonzaga tanba nia sempre koalia hodi defende direitu no interese trabalhador sira iha laran.
Entertantu hatan ba kestaun ne’e, Diretor Jeral SEFOPE Jacinto Baros Gusmao katak SEFOPE nia servisu la’os atu sai porta vos ka kontra ema maibe atu proteze trabalhador no mos investor sira oinsa sira bele mai fo servisu ba Timoroan sira.
“Ita labele hare buat ida ohin hau dehan taka matan sorin ho hare matan sorin, maibe buat hotu tenki la’o tuir nia regras” hateten DJ Gusmao.
Nia hatutan SEFOPE presiza hatene kronolijia husi parte BM no trabalhador sira.
“Ida ne’e mak hau dehan ami foin to’o iha mediasaun, sira la simu nafatin ba malu, ita bele ba to’o iha Tribunal, ne’e dalan nakloke,” nia katak.
“Ami tenki tau buat nebe tuir lolos, tenki proteze ba rua ne’e depois hare ba lei nebe mak iha,” nia tenik.
