Xefe Departementu Eletrisidade Timor-leste (EDTL) Sentral Distritu Baucau, Paulino A. da Costa hateten iha 2012 tinan ne’e nia parte sei monta kontador prepagu iha komunidade sira nia uma tanba durante ne’e komunidade barak mak laiiha konsiensia atu selu ahi.
“Diploma Ministerial sai iha 2003 atu selu ahi e to’o ohin loron ami sei prosesa nafatin hein hela ema atu mai selu ahi, konsumedor sira ne’ebe uza ahi iha dever atu mai selu ahi,”hateten Xefe Paulino A. da Costa semana kotuk ( 12 /01)iha nia knar fatin Baucau Vila Nova.
Tanba ne’e nia parte sei forma ekipa ida hodi hare kestaun pagamentu baa hi ne’e. “Ami sei halo ekipa ida atu ba fatin do’ok atu hare problema sira ne’e, halo nusa mak konsumedor sira ne’e la mai halo pagamentu, husi sa tinan mak la mai halo pagamentu ami iha resivu kompletu ninia difikuldade iha ne’ebe,”nia dehan.
Tuir nia, konsumidor ne’ebe iha konsiensia ful-fulan sira mai selu maibe barak liu mak la selu.
Nia afirma,uluk iha 2003 EDTL halo ona sosializasaun ba komunidade iha suku-suku sira katak dolar ida ba sira ne’ebe kbi’it laih , $1,12 sen ba sira ne’ebe nato’on, $1,15 sen ba ema ne’ebe fa’an kios sira no $2,00 to’o $2..40 sen por KWH ba emprezariu bo’ot sira inklui NGO nasional no internaisonal no Governu.
Xefe EDTL Baucau ne’e hateten, konsumidores sira ejiji sira nia direitu maibe lahatene sira nia dever atu selu ahi ful-fulan.
Relasiona ho problema ne’e, parte EDTL Nasional iha ona planu atu monta kontador prepagu iha Distritu balun hanesan Distritu Liquisa,Manatuto,Lospalos,Baucau inklui mos Distritu Dili iha tinan ne’e.
Entertantu Rosallina de Sousa nudar komunidade hateten monta prepagu ahi tenki lakan normal.
“Ami bele selu tuir tarifa ne’ebe iha se ami selu tiha maibe ahi kontinua lakan mate hanesan oras ne’e dadauk ne’ebe ahi kontinua lakan mate ne’e ami bele lakon$1 dollar ba fulan barak nia laran mos ami sente la diak,”nia dehan.
