Maske governu aloka ona orsamentu husi orsamentu jeral 2010 ba projetu konstrusaun ponte Tono,Sub-distritu Pante Makasar,Distritu Oe-Cusse maibe to’o agora seidauk realiza, tanba ne’e membru Parlamentu Nasional husi bankada opozisaun husu ba governu liu husi Sekretariu Estadu Obras Publika (SEOP) atu responsabiliza ba kestaun ne’e.
Deputadu Joaquin Amaral husi bankada opozisaun Fretilin, husu ba SEOP atu fo esplikasaun kona ba projeitu ne’e tanba tinan rua ona maibe projeitu seidauk la’o.
‘’Governu tenke responsabiliza ba konstrusaun ponti Tono Distritu Oe-Cusse nian ne’ebe to’o agora seidauk realiza. Bainhira ami halo fiskalizasaun iha fatin refere nunka hetan obra ruma no ami simu keisa ,keisa katak iha manipulasaun ruma, ne’eduni governu tenke esplika mai ami ohin loron atu povu hatene osan sira ne’e ba ne’ebé,” husu Deputadu Amaral semana kotuk (17/01) iha plenaria parlamentu.
Tuir nia,durante Governo Aliansa Maioria Parlamentar (AMP) nia ukun, gasta ona orsamentu lubuk ida maibe nia rezultadu ladun fo benefisiu ba komunidade sira.
“Povu kontinua la asesu dalan nebe diak, ahi lakan-mate no ponti la iha, pior liu tan ponti sira ne’e abandona la realize,’’Amaral kestiona.
Hatan ba kestaun ne’e Secretariu Estadu Obras Público, Domingos Caero katak la’os abandona maibe la’o tarde tanba kompania sira hadau malu hodi hato’o keisa ba Ministeriu Publiku tanba ne’e mak to’o agora seidauk realiza.
‘’Sim kazu ponti Tono ne’e los duni, ne’e tanba desizasaun husi Konselhu Ministru tau ona ba kompania Kuatru Kolegas ,Join Venture,ho kompania bo’ot ida husi Indonesia naran PP maibe depois kompania sira nebe maka tuir konkursu ne’e ladun satisfas sira hatama keisa ba Prokuradoria Jeral (PG)ne’e mak to’o agora seidauk realize,tanba sei submete ba investigasaun se karik hatama reklamasaun mai ministerial entaun ne’e it abele responde,’’Caero klarifika.
Nia afrima, konstrusaun bele la’o bainhira rezultadu investigasaun sai ona.
“Ami sei hein hela resultadu hafoin maka halo arenda serbisu ho kompania ne’e maka manan Tender para ba halo serbissu tamba ida ne’e maka konstruksaun ba ponti Tono ne’e la’o tardi inklui mos ponti sira seluk iha rai laran,”nia dehan.
Mota tono hanesan mota ida ne’ebé uniku Bo’ot no luan iha Oe-Cusse , waihira tempo udan monu rai sempre mosu mota boot hodi Difukulta agrikoltores besik suku sanulu resin rua husi suku sanulu resin walu ne’ebé ejisti iha Oe-Cusse, atu lori sira nia porodutu local inklui mosu asidente mota lori ema. durante ne’e povu atoni tau fiar no esperansa ba Governo atu halo ponti maibe nunka hetan nia resultadu Afinal orsanmentu lubuk ida maka hetan ona alokasaun husi orsamentu geral estadu 2010 atu halo konstruksaun ba ponti Tono.
