“Ita ba iha fider tres nebe fider ne’e kobre dehan uma sira VIP ninian husi Praia dos Coqueirus mai tama iha Parlamentu, Palacio Governu ninian ida ne’e kada udan bo’ot sempre ahi mate tanba sirkuitu,” kestiona Deputadu Bankada Opozisaun Fretilin ,Inacio Moreira ,iha PN semana kotuk (16/01).
Inacio dehan ,eletrisidade ne’e hetan sirkuitu tanba fiu sira nebe liga foun ne’e la iha kualidade .
“Fiu sira ne’e la iha kualidade tanba uluk halo lufu-lafu de’it,”nia dehan.
Deputadu ne’e haktuir, bairo Praia dos Coqueirus iha loron Sabadu no Domingo ahi mate hela deit.
“Hau tenki ejizi tanba instalasaun fiu ne’e foin mak halo,sefose uluk nian karik hau sei kumpriende tanba ida ne’e foin mak halo la to’o tinan ida aat fila-fali de’it”nia komenta.
Entertantu Prezidenti PN,Fernando Lasama de Araujo mos rekonese katak, iha loron Sabadu dia 14/01, rezidensia parlamentu nian mate komesa tuku 11:00 to’o 12:00 kalan to’o fali tuku 07:00 dader mak lakan fali.
“Hau rasik tenta telefone ba Sekretariu Estadu Eletrisidade,hau telefone la foti,hau SMS mos la balas,”Lasama dehan.
“Kala hau deputadu hotu be ,Sekretariu Estadu hirus hotu hau,”.
Alende ne’e tuir Deputadu Francisco Jeronimo, katak antes ahi lakan normal iha distritu Liquisa, iha problema bo’ot tanba soke mate ema ida iha ne’eba.
“Iha Dili laran hau mos rona informasaun soke mate mos ema,hau husu ba sekretariu estadu eletrisidade para atu nune’e fo informasaun lolos ba ita nia povu,”Jeronimo kestiona.
Entretantu bainhira jornalista koko konfirma asuntu ne’e ba iha Sekretariu Estadu Eletrisidade Aguae Urbanizasaun (SEAU) Januario Perreira maibe lakonsege okupadu.
