Relasiona ho lampu sinais trafiku ne’ebe lakan-mate iha capital Dili, Staff Senior Traffic, Diresaun Nasional Transporte e Terestres (DNTT), Joao Eugenio da Silva hateten iha tempu badak nia laran DNTT sei haruka kompania CELDA atu hadia hikas tanba ne’e responsabilidade kompania nian.
“Traffic light tolu mak failansu. Hau hateten ona kompania atu responsabiliza tanba ninia servisu hotu iha loron 31 Setembru 2011,” hateten Staff Senior Traffic DNNT Da Silva, iha nia knar fatin, Balidi, Dili, semana kotuk (11/01).
Nia hateten tana kompania CELDA sei responsavel ba trafiku light tolu nebe aat hela.
“Trafik Light tolu nebe aat ona mak hanesan, Ministeriu Justisa nia oin, Delta Comoro ho Toko Baru.”
Entertantu tuir Deputadu Domingos Mesquita hateten lampu sinais tranzitu ne’ebe aat fo impaktu ba engrafamentu transporte iha Capital Dili.
“Pior liutan lampu sinais tranzitu la funsiona ho diak maske iha ona ahi bele garante eletrisidade maibe sistema tranzitu sidauk monta ho diak,” Deputado Mesquita dehan.
Tanba ne’e nia parte husu ba Ministeriu Infraestrutura (MI) atu halo kordenasaun diak ho DNTT nomos ho Polisia Tranzitu nian nune’e bele halo kontrola ho diak.
Iha fatin hanesan, Deputadu Mateus de Jesus hateten lampu tranzitu ne’ebe la funsiona oras ne’e iha prosesu hadia nia laran.
“Sira sei hadia fiu sira nebe aat ona atu nune’e la kleur tan lampu sira ne’e bele lakan ho diak ona,” nia tenik.
