Relasiona ho eleisaun bo’ot rua Parlamentar no Prezidensial ne’ebe sei halao iha tinan ida ne’e, Deputadu Francisco Branco, FRETILIN, hateten tuir lei sidadaun hotu-hotu bele tuir votasaun iha fatin ne’ebe deit, la’os deit iha fatin ne’ebe nia rejista ba.
“Maibe maioria husi parlamentu ne’e hasai desizaun katak ba 2012 votasaun ba eleitor sira, sidadaun sira sei vota iha fatin ne’ebe sira rejista ba,” hateten Deputado Branco, semana kotuk (11/01) iha Parlamento Nasional, Dili.
“Ida ne’e bele maibe ita bele limita ema nia liberdade atu sirkula ba mai.”
Iha fatin hanesan Deputado Domingos Mequita, PUN, hateten defisil ba ema atu ba vota iha distritu sira tanba ema barak mak mai husi Dili.
“Liu-liu ba estudante sira atu fila fali ba kada distritu ne’ebe sira halo kartaun rejistu ba atu vota, tanba transporte no udan,” atenik Deputado Mesquita.
Tanba ne’e nia parte husu ba Sekretariadu Tekniku Administrasaun Eleitoral (STAE) no Komisaun Nasional ba Eleisaun (CNE) atu tetu didiak kestaun ne’e oinsa bele fasilita ema hotu-hotu atu ba vota.
“Karik ho desizaun ne’e nafatin, tan deit udan bo’ot, transportes nebe limitadu, bele halo balun la konsege ba vota,” nia haktuir.
Entretantu tuir Deputadu Independente Mateus de Jesus katak governu halo sistema ida ne’e atu hafasil halo kontrolu tanba ida-idak tenke fila nia distritu hodi tuir votasaun.
“Se ita fo livre ba eleitor hotu-hotu entau kartaun de votu tenki prepara labele hatene,’’ nia hateten.
Iha lei hateten katak, sidadaun ida-ida tenki ba vota iha ninia fatin tuir nia rejista ba.
“Se lae dala ruma kartaun iha fatin ida hotu ba fali fatin ida bele atrpalha prosesu eleisaun ne’e,”nia katak.
