Tuir Xefe Estadu Maior Falintil- Forsa Defeza de Timor-leste (F-FDTL), Brigadeiru Jeneral Lere Anan Timor katak desizaun ne’ebe Konselhu Ministru fo sai katak Artemarsiais ne’ebe la halo problema, la taka maibe taka deit ba Arte Marsiais sira nebe mak loro-loron kria problema hela deit.
“Pur ezemplu Kempo, Taekwondo, Boxing ne’e lori Timor-leste nia naran ba eventu internasional ida ne’e la taka,” hateten Brigadeiru Jeneral Lere Anan Timor, semana kotuk (11/01) iha Fatuhada, Dili.
Kona ba arte marsiais hotu sei taka, tuir nia labele sala interpretadesizaun husi Konselhu Ministru.
“Kempo sei autoriza, Taekwondo sei autoriza ,Boxing sei autoriza sira bele hala’o sira nia atividade,” Brigader Jenral Lere informa.
Tuir nia mos katak, aban bainrua Sekretariu Estadu Seguransa sei anunsia ba Artemarsiais ne’ebe mak atu loke nafatin no nebe maka tenki taka.
“Dala ida tan hau fo hatene ba ita nia joven sira katak, taka ba sira ne’ebe komete krime halo problema loro-loron.”
Tuir nia mos katak arte marsiais ne’ebe taka durante tinan ida mak hanesan Persaudaraan Setia Hati Terate (PSHT), KORK,77 no seluk tan ne’ebe la tama iha
“Artemarsiais hanesan desportu ida hanesan ho tebe bola no basket.”
Iha parte seluk, Deputadu Arao Noe, hateten Artemarsiais nee’e mak iha Sekretariu Estadu Juventude no Desportu nia okos la taka.
“Organizasaun Artemarsiais nebe organizasaun popular, povu nian, hanesan 77, PSHT sira seluk nebe ke durante ne’e halo konflitu be-beik no mos sira nunka partisipa kompetisaun iha sekeretariu estadu Juventude e desportu ninian,” Deputado Arao dehan.
Deputado ne’e dehan mos katak organijasaun sira ne’e mak sei suspende sira nia aktividade. Maibe “la’os taka maibe suspende deit.”
Arao hatutan , ho suspensaun ida ne’e fo atensaun ba lider artemarsiais sira atu konsolida an hodi respeita maluk sira seluk atu nune’e labele kria violensia.
“Komesa dia 22 de Dejembru to’o 22 Dejembru 2012,se periode ida ne’e mak artemarsiais sira sei halo nafatin atividades halo kriminal oho malu,tuda malu ho naran organizasaun sira nian mak sei prolonga tan suspensaun ba tinan ida ba grupu ida nebe halo problema hanesan ne’e,”nia dehan.
Entretantu bainhira TDW koko konfirma asuntu ne’e ba iha Sekretariu Estadu Joventude e Desportu (SEJD) Miguel Manetelo, maibe la konsege tanba okupadu ho servisu.
