Staf Senior Traffic Light Diresaun Nasional Transporte e Terestres (DNTT) Joao Eugenio C.da Silva hateten, iha tempu badak nia laran DNTT koordena ho Polisia Tranzitu sira hodi halo pasa revista ba taxista sira nebe la uza farda.
“Sira nebe la uza farda ami sei kontakto polisia hodi kona sansaun ba sira, sei multa $40,00,” hateten Staf Senior Traffic ,Joao Eugenio C.da Silva,iha DNTT Balidi semana kotuk,(11/01).
Iha sorin seluk Deputadu Mateus de Jesus hateten lei hatur tiha ona katak taxista sira tenke uza farda bainhira halo operasaun.
“Maibe sira iha kamiza ida deit lor-loron sira tau konserteza sira tenki fase, entau sira tau farda seluk ona,” nia dehan.
Tuir Mateus katak dalaruma sira hakarak farda to’o tolu ka hat maibe tandeit ekonomiam labele entau sira bele uja deit ida ne’e.
“Importante sira tenki kumpri nafatin regra nudar taxista ”nia katak.
Alende ne’e tuir Deputadu Domingos Mequita katak DNTT ho Polisia tenki kontrola ba taxista sira nebe la uza farda.
“Maibe hau rona katak, komplain ruma husi Taksista sira farda dalaruma karun liu sira labele uza rua ka tolu entau, sira uza ida deit wainhira fase bokon tiha entau sira la konsege uza”dehan Mesquita.
