Relasiona ho funsiunariu temporariu balun iha Sekretariu Estadu Formasaun Profesional e Empregu (SEFOPE) seidauk sai funsiunariu permanente, SE Bendito Freitas hatan la’os funsiunariiu SEFOPE deit maibe mos iha ministeriu balun seidauk.
Tuir nia, sira tenki tuir konkursu atu hakat ba,”ita bo’ot hare katak, foin dadaun iha tinan ne’e nia laran Governu fo kedan transformasaun funsionariu kontratadu no temporariu kuaze 2 mil mak ingresa ona sai funsionariu permanente,” hateten SE. Bendito Freitas, iha PN semana kotuk (10/01).
SE.Freitas hatutan, kona ba funsionariu sira atu tama ba permanente, ne’e kompetensia Komisaun da Funsaun Publika (KFP).
“Ami so bele fo formasaun kona ba servisu maibe konaba funsionamentu publiku ne’e,ne’e kompetensia komisaun funsaun publiku nian,” nia dehan.
Entretantu tuir Deputadu Mario Viegas Carascalao husi bankada Partidu Sosial Demokratika (PSD) katak, ema nebe tama funsionariu temporariu, governu la iha obrigasaun ba sira atu hatama ba permanente.
“Tama ba permanente tuir kriteria nebe mak Komisaun Funsaun Publiku iha lei tuir konkursu publiku mak foin bele tama,”dehan eis governador ne’e.
Nia hateten la’os ema hotu-hotu tenke ba buka servisu iha Governu maibe mos presiza kria inisiativa particular sira.
“Hotu-hotu tama hotu ba iha Governu ,Governu la iha kondisoens agora, lolos redus funsiunariu mak iha la’os hatama be-beik,se la’e estadu selu labele,” nia tenik.
Tanba tuir nia, oras ne’e dadaun total funsiunariu publiku hamutuk rihun 30 (30.000) ona,ne’e barak liu.
Enkuantu tuir Deputadu Antonio Cardoso husi bankada Fretilin mos hanesan Prezidente Komisaun H Parlamentar, katak atu sai funsiunariu permanente tenke liu husi kriteriiu ne’ebe mak iha.
“Ohin loron ita hotu hatene katak depois husi ministeriu hotu-hotu depratamentu hotu-hotu sira sei hato’o sira nia lista ba funsaun publika.”
Hafoin hato’o lista ida ne’e ba iha funsaun publika mak foin bele estuda nebe klean.
“Kestaun ida ita hakarak hatene nia servisu tinan lima maibe nia liu husi prosesu saida, tenki hatene,” tenik Cardoso.
