Atu asegura no proteze trabalhadores Timor Oan iha Korea du Sul ba diskriminasaun no esplorasaun, alende embaixada governu liu husi Sekretariu Estadu Formasaun Professional e Empregu (SEFOPE) mos monta ona Adidu do Trabalhu ida (Trabalahdor Imigrasaun) iha ne’eba.
“Politika governu nian atu protese direitu trabalhador Timoroan iha Korea de Sul alende ita nia embaixador ita mos monta ona ita nia adidu do trabalho iha ne’eba atu hare trabalhador sira se trabalhador sira hasoru kazu ruma ita nia adidu ne’e mak sei halo negosiasaun ho patraun kompania ne’ebe halo problema ho
trabalhador Timoroan hodi garantia seguransa no protesaun ba direitu no dever trabalhador nian iha korea de sul,” dehan Diretor Nasional du Emprego (DNE), Paulo Alves, semana kotuk (12/01) iha Kaikoli Dili.
Nia hatutan katak trabalhadores sira ne’e tama ona iha ema nia rain entau lei ema Korea nia mak sei regula la’os lei Timor-Leste nian ne’eduni importante mos ba adidu atu tau matan ba trabalhadores sira.
Nia informa, iha kazu barak mak resolve ona, kazu ida mak trabalhadores Timor oan involve iha trabalhador ilegais konsege resolve ona husi adidu no polisia imigrasaun Korea Sul nian katak trabalhador sira diak liu fila fali mai iha timor mak ba fali se operasaun kaer kona ne’e sira haruka fila labele ba fali ona korea atu halo servisu maibe responde ne’ebe husi trabalhadores sira katak sira pronto atu simu konsekuensia ne’ebe iha.
Nia afirma tan iha mos trabalhador nain ida mak fila ona mai iha Timor tanba hetan acidente liman kotu, ne’eduni desidi lakohi fila ba Korea maibe nia hetan kompensasaun husi kompania no nain hat mak fila tiha ona iha fulan hira liu ba tanba involve konflitu baku malu ho trabalhador nasaun seluk.
Alves dehan, DNE iha komunikasaun diak ho adidu ne’ebe iha obrigatorio halo protesaun ba direitu trabalhadores Timor oan iha Korea do Sul liu husi internet ne’eduni buat hotu la’o ho diak.
Iha lidun seluk, Presidente Konfederasaun Sindikatu Timor-Leste (KSTL), Jose da Conceição da Costa hateten politika governu hodi tau adidu do trabalho (trabalho imigrasaun) atu tau matan ba direitu trabalhadores sira nian iiha Korea du Sul ne’e politika ne’ebe pozitivu, maibe mos tenke kria rede ida nune’e bele garante seguransa ba trabalhadores sira.
“Ita tenke identifika didiak knar adidu ninia ho kompetensia no knar adidu tenke pro ativu nafatin katak halo dialog nafatin ho trabalahadores sira tanba dalaruma ema balun lakohi hato’o keisa tanba hetan ameasa,” nia katak.
