Relasiona ho meja-kadeira ne’ebe sei menus iha eskola An’nur no difikulta prosesu aprendizajen, husu ba governu liu husi Ministeriu Edukasaun (ME) atu tau mos atensaun ba sira tanba eskola ne’e maske privada maibe nakloke ba ema hotu.
“Ami mesmu eskola privadu maibe kona ba kualidade ami la lakon ho eskola seluk, ne’e duni ami nudar profesores sira husu ba estadu oinsa ami nia profesor ida nebe maka sei voluntario iha ne’e hare sira nia salariu mos, tanba ami nia professor sira ne’e bele garantia katak sei hamosu estudande ho kualidade diak,” hateten Selestino Oliveira, Vise Diretor Eskola An’nur, semana kotuk (12/01) iha Kampo Alor, Dili.
Alende faltas meja-kadeira, tuir Vise Diretor Oliveira eskola ne’e iha kondisaun aat hela maibe sira seidauk hetan ajuda atu halo rehabilitasaun, eskola so hetan deit mak livrus,meja-kadeira nomos profesores sira.
“Ami koko ona hakerek proposta ba Governu maibe seidauk hetan rezultadu ida,” nia dehan.
Nia hatutan, meja-kadeira hirak ne’ebe ajuda husi governu desde 2007, oras ne’e balun mos aat ona,maske nune’e prosesu aprendizajen kontinua la’o.
Hatan ba preokupasaun ne’e, Diretor Ensino Baziku ME, Alfredo de Araujo katak eskolas hotu-hotu iha Timor laran tomak inklui eskolas privadas sira hetan hotu ajudus husi governu maibe tenke faze pur faze. “Labele hetan dala ida e hotu kedas,” nia katak.
Tuir nia, total eskolas publiku inklui privadas iha rai laran hamutuk iha 1.240 resin e sira ne’e hetan hotu ajudus husi governu.
Nia hatutan, agora prosesu nebe mak la’o diferente tanba agora husi Distrital mak kanaliza hodi hare nebe maka prioridade liu atu hetan atensaun ne’e wainhira caundu eskola nebe mak hatama proposta maibe seidauk hetan rezultadu ne’e tenki hein inclui mos eskola privadas nebe maka hatama ona proposta maibe seidauk hetan, atendmentu ne’e fase pur fase.
