Segundu Komandante Policia Nasional Timor-Leste (PNTL), Superintendente Afonso de Jesus, optimista tebes katak polisia nasional pronto atu kontrola sistema seguransa iha rai laran durante 24 oras bainhira mandatu Nasoens Unidas (ONU) remata iha Timor-Leste iha 2012 nia laran.
“Mandatu UN ho governu Timor-Leste nia mandatu hotu iha 2012 parese ke depois de Elisaun 2012 remata tiha mak foin sira fila, ne’ebe hau hanoin mandatu ne’e klaru tiha ona. Ne’e be sistema siguransa depois de mandatu ne’e, PNTL mak sei halo hela tuir saida maka lei organika PNTL no lei Konstitusional RDTL ne’ebe fo kompetensia ba PNTL atu promove kondisoens siguransa iha nasaun Timor-Leste no atu asegura sidadaun hotu-hotu nia liberdade no direitu atu bele lao. Sidadaun hotu-hotu ninian funsionamentu lao normal ne’e PNTL nia knar ne’ebe mak define ona iha lei,” dehan Segundu Komandante PNTL, de Jesus, iha nia knar fatin iha PNTL Kaikoli, Dili, semana kotuk (06/01).
Nia mos afirma tan katak wainhira ONU nia mandate remata mos PNTL continua hala’o nia servisu hanesan bain-bain nomos hanesan saida mak preve ona iha lei. Nune katak PNTL sei mantein ho nia posisaun para atu bele halao siguransa ba Nasaun Timor-Leste wainhira ONU fila.
“PNTL pronto tanba ho realidade iha fatin izoladu, fatin sira ne’ebe mak laiha prezensa UN nian ne’e, PNTL pronto iha neba atu asegura ita nia povu sira tanba ne’e maka PNTL pronto 24 oras, pronto kualker tempu deit wainhira mandatu UN hotu,” dehan Segundu Komandante de Jesus.
Entertantu tuir Deputado Jose Teixeira, FRETILIN, iha nesesidade bo’ot atu instituisoens hotu Estadu no mos populasaun tomak nian atu servisu hamutuk ho PNTL.
“Ita presiza servisu maka’as, ita hotu hamutuk, Estadu hamutuk, Sidadaun hamutuk ho Estadu, komunidade Timoroan hamutuk hotu, ema husi aldeia hotu-hotu. Ita hotu maka tau ita nia esforsu maka’as tebes atu bele hare katak siguransa lao iha ita nia rain,” dehan Deputado Teixeira.
Nia mos sujera katak lolos PNTL tenki iha postu ida iha aldeia nomos iha bairus no servisu hamutuk ho komunidade sira hodi identifika sira nebe nakar iha komunidade laran no servisu hamutuk ho autoridade local atu bele hare katak nakar sira ne’e tenki nakar tur nia fatin.
“Ne’e maka hanesan sistema baziku. Ida ne’e ita bele halo wainhira mandato UN hotu,” haktuir tan Deputado Teixeira.
