Lei ne’ebe garante sidadaun Timoroan sira ne’ebe hela iha estranjeiru atu tuir Eleisaun Lejislativa no Prezidensial iha 2012, governu altera hikas ho razauun laiha kondisaun ka laiha kbiit atu bele bele halo eleisau iha estranjeiru.
Hare ba razaun hirak ne’e governu lori kestaun ne’e ba iha plenaria Parlamentu Nasional atu debate no hetan reaksaun makas hosi Deputado Partidu Sosial Demokrata (PSD) no KOTA ne’ebe vota kontra alterasaun Lei Eleitoral.
“Sira iha neba haruka osan mai iha Timor atu kontribui ba ita nia moris iha Timor ne’e hau senti triste ba ida ne’e. Ne’e hanesan premiu ida ke invenenadu ke mai iha tinan foun ida ne’e nia laran tanba sa, tamba lei ne’e kuandu ita diskuti, STAE mos iha ne’e, husi governu mos iha ne’e, hotu-hotu konkorda,” hateten Deputadu Mario Viegas Carrascalao, PSD, iha Parlamentu Nasional, Dili, semana kotuk (04/01).
Ba Deputadu Carrascalao mudanda ba artigus relasiona ho Timoroan iha rai liur bele tuir eleisaun 2012 significa katak neglijensia hosi partes kompetentes la’os tanba kondisoens mak laiha.
“Sei kondisoens politikas ne’ebe relasiona ho Indonesia ne’e problema Indonesia nian la’os ita nian. Ita mak rekunhese dupla sidadania, ba ita sira Timoroan sira la’os Indonesia. Ba Indonesia sei la simu problema seluk. Ita mak rekunhese. Ne’e duni maka ita hasai direitu ba sira ne’ebe ke iha, ne’ebe mak hakarak kaer nafatin sira nia Timorense. Ne’e duni hau vota kontra.”
Deputado Carascalao dehan tan katak razaun hirak ne’ebe govern aprezenta iha plenaria la’os razaun ne’ebe todan tanba ne’e labele uza razaun hirak ne’e atu labele implementa lei ne’e.
Iha fatin hanesan Presidente Partidu Klibur oan Timor As’wain (KOTA), Deputado Manuel Tilman hateten katak ho alterasaun lei eleitoral ne’e, governu hasai tiha ona sidadaun Timoroan sira ne’ebe hela iha estranjeiru nia direitu.
“Ne’e mak hau vota kontra,” hateten mos Deputado Tilman.v
