Komisariu Comisaun Nasional das Eleisoens (CNE), Arif Abdullah Sagram, mak trata asuntu relasaun publiku hateten katak partidu rejista iha ona Tribunal Rekursus (TR) hamutuk 23 partidu.
“Karik partidu 23 ne’e hotu-hotu tuir iha eleisaun jeral ga lae, ita seidauk hatene,” hateten Komisariu Sagram, iha edifisiu CNE Kintal Bo’ot, Dili, foin lalais.
Komisariu Abdullah mos hateten katak karik partidu 23 ne’e hotu sei hato’o sira ninia kandidatu ida-idak ba pozisaun Prezidenti da Republika ka lae nia rasik seidauk hatene.
“Tuir kriteria ne’ebe mak iha ba rejistu iha Tribunal Rekursu, entaun Tribunal Rekursu mak sei desidi se mak bele ba sai kandidatu ba Prejidenti da Republika,” hateten Komisariu Sagram.
Tuir nia esplikasaun mos CNE hein deit atu simu rezultadu hosi TR katak se-se mak sei sai kandidatu ba Prejidenti da Republika no katak desizaun ida ne’e iha fulan Janeiru 2012 mak sei foin bele hatene.
Entertantu Deputadu Parlamentu Nasional, Natalino do Santos, hateten katak Estadu Demokratiku fo biban ba ema hotu-hotu atu harii ninia partidu politiku.
“Ninia objetivu oinsa atu bele fo kontribuisaun no partisipasaun ba dezenvolvimentu Estadu ida ne’e no mos ba povu,” dehan Deputadu dos Santos.
Tuir nia mos katak horas ne’e dadauk partidu hamutuk 23 mak rejistu ona hetan ona legalidade atu compete iha eleisaun ne’ebe mak mai.
