Comisaun Nasional das Eleisoens (CNE) husu ba Partidu Politikus kik atu halo koligasaun entre malu hodi nune’e bele hetan kadeira hafoin Eleisaun Lejialtiva iha 2012.
“Loron 15 Dezembru [2011] ne’e CNE halo sorumutu ho partidu politiku sira para sosializa ba sira para bele sira hatene katak halo partidu ne’e fasil maibe karik sira bele moris ga lae,” hateten Komisariu CNE Arif Abdullah Sagram, iha edifisiu CNE Kintal Bo’ot, Dili, foin lalais.
Komisariu Sagram husu atu diak liu partidu politiku kik sira halo koligasaun ba malu atu nune’e bele hetan kadeira hafoin eleisoens iha 2012.
“Ita bot hetan 15,000 [votos], hau hetan 10,000, ida fali hetan 5,000. Sira bele avansa ho naran ida entaun sira [koligasaun] bele hetan kadeira.”
Entertantu Deputadu Natalino dos Santos hateten katak, partidu bara-barak mosu tanba kriteria ne’ebe mak ema atu hari partidu mak la dun rigorozu.
“Karik iha 2012 hau hili fila fali sai hanesan Deputadu, hau sei kestiona oinsa atu hare fila fali konaba revizaun ba lei ida ne’e,” hateten Deputado dos Santos.
Deputado ne’e hateten tan katak maske partidu barak maibe importante oinsa mak espresa nia estatutu, manual no nia programas politiku no mos aprezenta lideransa nebe diak.
“Hau hanoin katak partidu laos hanesan organijasaun ka instituisaun NGO, maibe partidu nia responsabilidade ne’e bot ba desizaun poder politika tomak kuandu nia manan.”
Deputado dos Santos hato’o tan katak, partidu ne’ebe mak kompete ona iha eleisaun dala rua ka dala tolu ona mak la hetan asentu iha Parlamento Nasional diak liu lalika ona atu sai tan partidu.
“Se lae sei tanba iha subsidiu ba partidu politiku entaun sira eziste nafatin, ida ne’e ita hare ladun diak,” katak Deputadu dos Santos.
