Tuir Segundo Komandante Polisia Nasional Timor-Leste, PNTL, Superintendente Afonso de Jesus, hateten semana kotuk (6/01) iha Kuartel Jeral PNTL, Kaikoli, Dili, katak grupus artesmarsiais ne’ebe polisia kaer toman halo konfrontasaun sei lori kedas ba tau iha kadeia.
Konselho Ministrus halao reuniaun estraordinaria (22/12/2011) no hasai ona despachu liu hosi Primeiru Ministru Kay Rala Xanana Gusmão atu supende aktividades grupus artemarsiais sira ba durasaun tinan ida husi 22 de Dezembru 2011 to’o 21 de dezembru 2012.
“Ida ne’e baze legal ba mi atu halao ne’ebe husu ba maluk sira [artesmarsiais] ne’ebe kostuma atu halo konfrontasaun halo ba keta ami la hare hetan. Ami hare hetan pasiensia prosesu tau ba kadeia,” hateten Segundo Komandante PNTL de Jesus.
Segundo Komandante de Jesus apela ba membrus grupus artes marsiais atu diak liu ba estuda para aprende prepara a’an ba futuru duke tuir artemarsias folin laiha.
“Tamba komunidade kbiit laek sira ne’e la toba nonok, sira la han hakmatek fali, hemu hakmatek fali, labarak sira la ba escola fali tamba deit tauk ema ida rua nia lalaok atitude ne’ebe violentu oituan,” haktuir tan Segundo Komandante de Jesus.
Nia salienta tan ba suspensaun ba aktividades artes mariais iha ona baze legal ne’ebe Konselho Ministrus fo sai atu suspende aktividade artemarsiais ba tinan ida nune duni polisia sei hare se mak loke artemarsiais sei kaer lori ba prosesu tanba tenki kumpri desizaun Konselho Ministrus nian.
“Ida ne’e Sefe Estadu mak bo’ot, Xefe Governu mak bo’ot, Parlamentu mak bo’ot laiha tan ema ida ne’ebe bo’ot. Iha ne’e ne’ebe bazeia ba desizaun lei legal iha polisia ho forsa atu halo atuasaun lahare ba A, la hare ba B, kuandu la tuir dalan los, regra, kontra lei, regulamentu, halo aksaun krime polisia kaer.”
Hafoin Reuniao Extraordinario Konselho Ministrus nian Primeiru Ministru Gusmão hateten katak governu sei la permite violensia hosi grupus artes marsiais atu kontinua nafatin iha rai laran no tanba ne’e mak foti desizaun atu suspende sira nia aktividades ba tinan ida.
“Tenki taka kedas grupo artes marsiais no joga bola guling ne’e tamba hau sei la permiti atu violensia mosu beibeik hodi halo terus ema nafatin,” hateten PM Gusmão iha deklarasoens ba publiku.
