Atu garante Direitu Labarik iha rai laran Governu Timor-Leste liu husi Ministerio Solidaridade Sosial (MSS) kopera ho Komisaun Nasional Direitu Labarik (KNDL) no nia organizasoens parseiru kontinua halo konsiensializasaun no kampanha konaba direitus labarik nian ba familias no komunidade sira atu hasae sira nia kapasidade no kunhesimentu konaba direitus labarik tanba protesaun primeiru ba labarik sira hahu uluk iha familia laran.
“Governu sei fo apoiu nafatin ba organizasaun sira ne’ebe servisu iha area protesaun ba labarik atu halo kampanha no konsiesializasaun ba ema hotu hanesan familia no komunidade katak tenke fo potesaun ba labarik no direitu labarik nian labele fo servisu ne’ebe perigu ba sira nai moris,” dehan Directora Reinsersaun Sosial, MSS, Antonia Carmen Da Cruz, foin lalais iha servisu fatin iha Bemori, Dili.
Diretora da Cruz hatutan katak governu sei la halo sosializasaun direitamente maibe sei liu husi parseirus sira ne’ebe hetan fundus husi governu hanesan organizasaun sira ne’ebe servisu iha area protesaun labarik nian atu fahe informasaun ba autoridade lokal sira nune’e sira fo hatene ba inan-aman sira katak labele baku labarik sira no viola sira nia direitu.
Nia hatutan katak esforsu ne’ebe governu halo mak agora dadaun kopera ho ILO (Organizasaun Internasional konaba Servisu ONU) prepara hela esbosu ida konaba lei trabalho infantil maibe ne’e sei iha prosesu aprovasaun. Bainhira lei ne’e aprova ona sei regula servisu sira ne’ebe labarik ho minoridade bele halo no labele halo.
Iha parte seluk Komisaria Nasional hosi Komisaun Nasional Direitu Labarik (KNDL), Adalgiza Magno Ximenes, hateten katak KNDL sei kopera ho MSS no parseirus sira nafatin atu kontinua halo kampanha no sosializasaun ba komunidade no familia liu husi autoridade lokal sira iha distritus no sub-distritus iha rai laran.
“Halo kampanha no sosializasaun ba familia no komunidade atu hasae sira nia konsiensia nune’e labele viola labarik sira nia direitu. Ida ne’e planu ne’ebe KNDL iha ba tinan 2012,” dehan Komisaria KNDL Ximenes.
