Projetu piloto atu uza lian materna durante prosessu aprendizajen formal sei implementa iha fulan Fevereiro 2012 nia laran iha Distritu tolu uluk; Distritu Manatutu, Oe-Cusse no Lautem.
“Ami agora iha ona faze preparasaun. Prepara formador depois sira forma fali professores sira seluk iha baze. Ami foin daudauk halo tiha ona ba professores sira e ami mos prepara sosializasaun atu eduka komunidade sira. Kona ba implementasaun presiza sosializa uluk antes atu implementa,” hateten Asesor Lian Materna, Agostinho Caet, iha nia knar fatin Ministerio Educasaun, iha Vila Verde, Dili, foin lalais.
Tuir Asesor Caet presiza halo sosializa atu nune’e bele eduka komunidade sira iha baze kona ba implementasaun programa ida ne’e kona ba ninia prinsipios, nia benefisio kona ba planu pilotu ida ne’e.
“Ami hetan ona suporta husi Ministerio Educasaun iha dia 13 Novembro [2011]. Ami halo aprezentasaun iha incontru kinzenal iha Ministerio e Ministru [Educação] mos deside katak ita agora ne’e lao ho pilotu,” hateten tan Asesor Caet .
Loron marka atu hahu implemtasaun hanorin iha eskolas ho Lian Materna mak loron 21 de Fevereiru 2012.
“Loron ne’ebe importante tamba 21 de Fevereiru sai hanesan Loron Mundial ba Lian inan sira; ne’ebe sira sei konvida ema hotu hotu, Ministerio hotu hotu, parseiru sira hotu, media sira hotu atu bele bele asiste lansamentu projecto pilotu ne’e,” hateten tan Asesor Caet.
Entretantu tuir Secretario Jeral Sindikatu Professores Timor-Leste, SPTL, Fransisco Da Costa Fernandes, hateten SPTL rasik la konkorda atu implementa pilotazen lian maternal ba estudante sira no katak se implementa programa ne’e sei afeta mos ba iha parte rekursu humanus ninian husi distritu tolu ne’ebe atu implementa uluk lian maternal iha prosessu aprendizajen.
“Husi Sindikatu ninia hare katak bele mos kria diskriminisaun entre estudante ho estudante.”
Iha parte seluk Jose Da Silva nudar membru Instituto Nasional Liguistica (INL) hateten katak INL ninian objectivu mak atu apoia lingua Materna iha teritorio tomak nia laran para lian ne’e labele lakon nune laiha razaun lingua maternal at hanorin iha escola.
“Tamba Instituto Nasional Liguistica ninia hanoin katak lingua maternal kuandu implementa iha escola ita kria ona dezafio ida ba dezenvlvimentu oinsa mak ema atu estuda ba lingua ne’ebe mak konsagra ona iha Konstituisan Republika Demokratiika Timor-Leste,” hateten INL Membro da Silva. “Se kuando ita transfer hosi lian ida ba lian seluk ita defikulta ona lian Tetu. Oinsa mak nia [estudante] tenki estuda Tetun, oinsa mak nia estuda Portugues ho English. Lian ne’ebe ofisial iha Timor-Leste mak Tetun no Portugues.”
Tuir nia mos katak INL nia hakarak mak atu hamoris fila fali lingua maternamaibe laos hosi hanorin ba estudante sira uza lingua maternal maibe bele mos konsidera halo moris fila fali liu husi INL para lingua sira ne’ebe iha Timor labele lakon.
