Bazeia ba Plano Saude Escolar Publika ba 2012 sei koko hadia buat ne’ebe lao la dun efektivu iha tinan 2011 iha sector edukasaun publika liu liu ba alunos sira iha ensino baziku hanesan programas merenda escolar no saude publiko escolar.
“Tan ne’e mak parseiru sira sei tur hamutuk atu koalia kona ba planu saida mak presiza atu hadia iha 2012 ne’e,” hateten Director Nasional Aksaun Sosial Escolar, Carlitu Mota, foin lalais iha iha Salao Educasaun Non Formal (SKB ), Ministeriu Edukasaun, Vila Verde, Dili.
Tuir Director Mota katak husi Ministerio Saude (MS), Departamentu Saude Publiko Escolar tenki hare ba saude estudantes sira iha eskola publiku no tenki iha ligasaun oituan ho merenda escolar tamba saude publiko escolar ne’e iha duni Departamentu rasik atu haree kona ba assunt ne’e.
Nia hato’o ezemplu kona ba ligasaun ne’e, Departamentu Saude Publiky Escolar bele sosializa alunus atu bainhira atu han sira nia merenda eskolar tenki fase liman depois han hotu tiha sira atu loke fali kadernu no estuda fali tenki fase liman.
“Se karik la hanorin labarik sira atu fase liman molok han ka fase liman molok atu estuda ne’e ita la eduka labarik sira ba ambiente ida ne’ebe mos. Kuando ita fo aihan diak balun ba labarik sira han maibe sira foer hela mak kaer hahan para sira han ne’e sira nia saude la diak nafatin.”
Entertantu Ofisial Saude Publiko, MS, Rita Soares, hateten katak husi MS iha ona planu atu implementa programa saude publiko ba escola sira hanesan halo treinamentu ba Mestre sira no mos halo monitorizasaun ba escola sira servisu hamutuk MS, Servisu Agua e Saniamentu (SAS) oinsa para sira bele suporta ba ho saniamentu ba iha escola sira atu nune’e estudante sira bele aprende efektivu liu tan kona ba halu nusa sira bele proteje sira nia saude rasik.
“Iha Governo uluk iha ita nia meio kona ba merenda escolar nian ne’ebe mak servisu hamutuk ho Ministerio Saude no Ministerio Educasaun atu hare kona ba merenda escolar nian oinsa sa mak merenda escolar ne’e ita atu fo ba ita nia alunus sira para bele haforsa sira nia imunidade no daya tahan tubuh,” hateten Ofisial Saude Soares. “Ami mos sei fo treinu ba professors sira fo promosaun no sosializasaun no kampanha ba alunus sira atu hamoris fali Programa Lumbringa no Programa vitamina A ba ita nia alunus sira.”
Nia haktuir tan katak husi parte saude nian hare liu ba programa merenda escolar e kria mos politika no estrategia ida ba iha saude publiko escolar hodi nune’e se deit mak implementa saude escolar nian tenki tuir estrategia no politika ida ne’ebe mak iha tiha ona entre Ministerio Saude no Ministerio Educasaun.
