Maske lei hateen katak foguetes bele deit halo tarutu iha loron bo’ot liu liu durante celebrasaun tinan foun, maibe kalan-kalan foguetes tarutu iha sidade laran hanesan kilat tarutu tanba la iha kontrola.
“Hau hare situasaun ne’e primeriu halo hau triste oituan nudar sidadaun tamba buat ida ne’e laos baratu, buat ne’e karun. Hau hanoin iha ita nia rain ida ne’e ema sei kiak barak, mak ita nian maluk balun ne’e bele ba goza kalan-kalan ba sunu foguetes ne’e,” katak Deputadu Jose Teixera, Komisaun B, Parlamentu Nasional, Dili, semana kotuk (14/12).
Tuir Deputadu Teixeira diak liu hodi osan atus ida ba sosa ida biasa mai sunu duke ba sosa foguetes ne’ebe nia preso karun los, sunu buat vogetis ne’e atrapalha ema nia kondiasaun wainhira atu toba. Bele halo mos labarik sira toba ladiak nomos halo fali istrundu kalan- kalan.
“Ita hakarak atu ita tur metin, nonok iha uma. Ita hotu-hotu bele deskansa derepenti lae, tarutu dala lima, dala sanuluh, ida ne’e hau hanoin ema laiha konsideirasaun fali ba malu,” tenik Deputadu Teixeira.
Deputadu ne’e mos apela ba maluk sira nebe sunu foguetes tenki konsidera ba malu, no respeita malu liu-liu konsidera ba lei, tamba lolos fogutete sira ne’e halo iha fatin nebe luan laos iha fatin klot hanesan iha bairu-bairu.
Iha biban seluk Mateus de Jesus Soares, Komandante Interino Distrital Dili, Polisia National Timor-Leste PNTL, dehan katak polisia trasa ona planu operasaun kona ba foguete uza arbiru.
“Ami trasa ona operasaun kona ba asuntu foguetes ne’ebe mak tarutu bebeik. Polisia iha ona planu atu halo prevensaun kona ba ida ne’e,” dehan Komandante Interino Soares.
Nia haktuir katak implementasaun planu ne’e sei hahu iha tempu badak hafoin ba halo aprezentasaun planu ne ‘e ba Komando Jeral PNTL no depois ida ne’e bele implementa ona planu ida ne’e iha loron besik antes tama Natal no kolabora ho eskuadra-eskuadra sira ne’e hotu para atu toma medidas kuandu iha komunidade ne’ebe mak sunu foguete nebe mak dala ruma afeta ba estabilidade.
Iha parte seluk sidadaun nebe lakoi hatete nia naran nebe hela iha Bairo Pite hatoo katak foguetes tarutu halo nia familia tauk.
“Kalan-kalan ne’e ita rona hanesan fali kilat lian nebe ami rona ne’e ami tauk tebes,” katak nia.
Nia mos apela ba polisia atu hare mos ba situsaun ne’e hodi labele halo mosu tauk iha komonidade nia let.
