Atu garante direitu feto iha partisipasaun politika Governu liu husi Sekretaria Estado Promosaun Igualidade (SEPI) ho nia parseiru iha papel obrigatorio atu halo revizaun ba lei ne’ebe governu produs iha Parlamentu Nasional hanesan lei Konstituisaun RDTL artigu 17 ne’ebe koalia kona ba igualidade jeneru no konvensaun CEDAW artigu 7 kona ba partisipasaun feto iha politika no moris publiku.
“Atu garante direitu feto iha partisipasaun politika SEPI ho parseiru iha semana kotuk halo analiza ba lei ne’ebe governu produs iha Parlamentu Nasional husi prespetiva generu inklui lei numeru 6/2006 konaba elisaun nian. SEPI hamutuk parserius atu halo revizaun ba artigus balun husi lei ne’ebe iha atu garante partisipasaun feto iha lista kandidatura estruktura partidu nian,” dehan Director Nasional Politikal Dezenvolvimentu Jeneru (DNPDE), Armando Da Silva, durante seminario nasional ne’ebe organiza husi asosiasaun Hak, semana kotuk (15/12), iha Salaun São Paulo, Comoro, Dili.
Tuir Directr da Silva, politika governu nian liu husi SEPI adopta politika ida hanaran Abordazen Integrada Gender katak atu aborda perpektiva generu hanesan prosesu atu asesu, implikasaun ba feto ho mane mak kada planu no asaun politika inklui mos programa iha area hotu.
Programa no asaun sira ne’e henesan estratejia ida atu foti preokupasaun feto no mane ne’ebe integradu bainhira implementasaun politika ekonomia social ne’ebe diak no bele lori benifisiu ba feto ho mane, no Director da Silva espera katak ho estrategia ida ne’e bele elemina dezigualidade generu hodi atinji igualidade generu.
Iha lidun seluk Director Ezecutivu Asosiasaun Hak, Rogeiro Veigas Vicente, hateten katak asosiasaun Hak sei kopera ho organizasaun seluk hanesan Rede Feto, Caucus atu enkoraja feto politika sira atu partisipa iha elisaun jeral 2012.
“Esforsu ne’ebe asosiasaun Hak halo mak kopera hamutuk ho organizasaun feto hanesan Rede feto, Caucus atu inkoraja feto maluk sira atu involve aan iha vida politika no garantia direitu feto iha partisipasaun elisaun geral laos deit sai votante no partisipa iha elisaun maibe bele mos iha posibilidade tuir iha fatin ne’ebe estrategiku iha partidu no governu,” dehan Director Viegas.
