Diretor Ezekutivu Programa Monitorijasaun ba Sistema Judisial iha Timor leste (JSMP), Luis de Oliveira Sampaio hateten katak, staff Organijasaun Nasoens Unidadas iha Timor-Leste wainhira komete krime ruma la iha prosesa ba sira tanba imunidade diplomatika maibe importante Estadu mak tenki haruka fila ba sira nia rai.
“Tanba ne’e mak sira dala barak komete krime ka sira halo buat ruma nebe kontrariu ba ita nia regra interna domestika ninian, bele krime mos sira la responsavel,” hateten Diretor Ezekutivu JSMP Sampaio, iha Hotel Ventura, Dili, semana kotuk (16/12).
Krime sira ne’ebe mak sira halo tenki intrega ba sira nia ONU mak halo prosesa maibe hola medida seluk bele haruka ema fila fali ba sira nia nasaun nebe sira mai ne’e.
“Entaun pratika ka kustume ne’e mak eziste iha rai bara-barak laos iha Timor deit.”
Tuir Diretur Sampaio katak dala barak organijasaun ONU ba iha nasaun ida komete krime ruma, halo ema balun mate, lakon, nia familia la iha solusaun.
“Tanba ne’e mak ema hotu-hotu esforsu atu buka solusaun maibe to’o agora prinsipiu ne’e kontinua eziste.”
Entertantu Deputadu Mario Viegas Carascalao, PSD, Komisaun A ne’ebe trata asuntu Konstitusionais, Justisa, Admistrasaun Publika, Poder Lokal no Legislasaun do Governu hateten katak, Nasoens Unidas halo krime ruma iha Timor-Leste sira tuir julgalmentu iha sira nia rai, laos iha Timor.
“Fila fali mak halo julgamentu, ita laos halo fali julgamentu ba sira,” dehan Deputado Carrascalao. “Laos justisa la iha, justisa maibe semak halo justisa ne’e laos ita mak halo justisa.”
Alende ne’e Deputadu Independenti Mateus de Jesus hateten katak maske sira halo krime ruma iha Timor-Leste ita nia lei la kondena sira maibe lei internasional bele kondena sira.
“Karik ita nia lei mak la kondena sira karik, lei internasional iha tanba ema hotu-hotu iha mundu iha direitu,” dehan Deputado de Jesus.
