Deputadu Menejes hateten katak horas ne’e dadauk Parlamentu Nasional seidauk hetan esbosu Lei kona ba protesaun ba konsumidores sira nian.
“Foin dadauk Parlamentu atraves liu husi Lei kioan ida konaba Lei Asaun Brankeamentu ne’e para atu hare ba kestaun produtu sira,” hateten Deputadu Menezes iha Parlamentu Nasional, Dili, semana kotuk (13/12).
Deputado ne’e hatutan tan katak konsumidor sira sempre sai vitima ba arrogansia produtor sira no distributor sira ne’ebe fa’an sasan iha merkadu no katak maske Lei Asaun Brankeamentu ne’e mos parte ida protesaun ba konsumidores sira maibe seidauk klean.
“Ita persija tan ajensia ida ka institutu ida nebe tau knar hodi fo defeza ba konsumidor sira. Wainhira konsumidor sira hetan produtu ida ke la diak, sira rasik ba direitamente ba iha ajensia ne’e para hodi hato’o keisa para atu halo prosesa [produtor ka distribuidor],” haktuir tan Deputado Menezes. “Hau fiar katak, neneik-neneik ita tenki hari ita nia ajensia ida para atu bele taumatan lolos ba iha direitu konsumidores nian tanba ida ne’e mos parte ida violasaun direitus humanus.”
Iha fatin hanesan Deputadu Francisco Branco, Komisaun C, FRETILIN, ne’ebe trata assuntu Finasa, Ekonomia no Anti Korupsaun hateten mos katak se Estadu la harii ajensia ida atu proteje konsumidores sira sei nafatin sai vitima ba produtu sira nebe liu ona tempu ne’ebe bele afeta saude publiku.
Deputado Branco hateten mos katak horas ne’e dadauk Bankada Fretilin draft ona lei ida no sira sei hare hamutuk hodi avansa ba oin hodi bele proteje konsumidor sira iha Timor-Leste.
“Ami sei hare hamutuk husi bankada depois mak ami avansa hodi anunsiu ba maluk sira sira seluk suskreve hotu depois aprezenta ba parlamentu,” hatutan tan Deputado Branco.
