Forum Komunikasi Joventude (FCJ), Organizasaun Naun Governmental (ONG) ne’ebe kompleta ho uma temporariu ida ho naran Oratorio Don Bosco pronto atu fo asistensia ba labarik sira ne’ebe risku hanesan labarik sira ne’ebe vitima ba Violensia Domestika, explorasaun, abandona no hetan konflitu ho lei.
FCJ oferese fatin hakmatek ba labarik sira atu hela ba bainhira sira nia kazu seidauk bele resolve.
“Ami nia uma hakmatek ne’e mos loke durante 24 oras ba komunidade, polisia no Tribunal sira ne’ebe hakarak lori labarik mai iha oratorio Don Bosco FCJ ho problema saida deit ami pronto atu atende liu-liu fo assistensia bazika depois mak fo asistensia seluk bazeia ba kazu ne’ebe iha,” dehan Director FCJ, Cipriano Freitas de Oliveira, semana kotuk (13/12), iha knar fatin iha Balide, Dili.
Director Oliveira hatutan katak Oratorio Don Bosco FCJ simu labarik tuir kapasiadade organizasaun nian tanba FCJ iha toba fatin 40; 20 ba labarik mane no 20 ba labarik feto.
Hahu iha fulan Janeiru to’o Julho 2011 sira simu labarik hamutuk nain 23 ne’ebe vitimas ba violensia oi-oin hanesan violensia domestika, abandona husi familia no komete krime todan. Numeru ne’e kompostu husi feto hamutuk nain tolu no mane hamutuk 20.
Aktividade ne’ebe FCJ implementa mak identifika labarik sira nia kazu ida pur ida, hare sira nia nesesidade, no buka no hatan ba nesesidade labarik nian.
“Komu sira hela iha ne’e durante tinan rua ka tolu entau FCJ iha planu atu kria aktividade ba sira hanesan edukasaun non- formal nune’e mos balun haruka ba eskola maske iha problema oituan ho dokumentus labarik nian maibe bele rezolve tanba FCj servisu ho Ministerio Edukasaun,” haktuir Director Oliveira.
Alende fo asistensia ba labarik FCJ halo vizita mos ho familia labarik nian atu bele hatene klean liu tan konaba kazu ne’ebe labarik komete nune’e bele resolve tuir kazu ne’ebe iha.
