Membru parlamentu ko¬mi¬¬saun C hateten katak lei brankeamentu kapitais parlamentu reajenda ona atu diskuti kontinua espesialidade tanba lei ne’e disktui to’o tiha ona artigu sanulu resin lima(15).
“Hau hakarak hateten lei ida importante tebes, na pratika atu kontrolu ita nia sistema finasiamentu, ou tranformasaun no sirkulasaun osan iha ita nia rai laran” hateten Deputadu Aderito Hugo, CNRT, iha Parlamentu Nasional, Dili, semana kotuk (5/12).
Deputado Hugo hateten tan katak nia la konkorda ho deklarasaun balun tan deit ba lei ne’e buat hotu hotu labele lao no katak hanoin iha ne’e sala.
“Kada transaksaun ida nebee ke minimu 10 mil ba leten akontese iha banku, kuandu atu hatama no hasai husi banku nia tenki prense criteria no halo deklarasaun osan ne’e 10 mil mai husi iha nebe,” hateten Hugo.
Lei Brankamentu kapitais no finasiamentu terorismu nian lei ida husi lein lubuk ida nebe iha tiha ona.
“Ida ne’e ita kria deit mekanismu ho obrigasaun ba banku hotu opera iha Timor-Leste , ajensia transferensia orsamentu iha Timor-Leste atu iha mekanismu ida ne’e, para ita iha sistema informasaun no sirkulasaun finansas iha rai laran ninian.”
Deputado ne’e esplika tan katak oras ne’e dadauk Timor-Leste seidauk iha regulamentu ida atu kontrola tranferensia osan ba iha rai liur.
“Banku Sentral no Governu liu husi lei ida ne’e halo regulamentu atu regularize aktividade transferensias osan iha rai laran, mai husi nebe–nebe deit.”
Entertantu Deputadu Francisco Branco, FRETILIN, hateten katak Lei Brankeamentu Kapitais bele taka dalan ba transaksaun osan husi liur mai iha laran no husi laran ba liur.
“Osan sira nebe nia hun ne’e la mai negosiu nebe mos, hanesan negosiu mafia, droga, trafiku umanu, korupsaun, atu taka dalan ba ida ne’e” Deputadu Branco dehan.
