Maske Eleisaun Jeral 2012 besik dadaun ona maibe Deputadu Independenti Mateus de Jesus iha Parlamentu Nasional hateten katak nia seidauk iha hanoin atu afilia ba partdiu ida maske nia sai husi ona Partidu Unidade Nasional (PUN).
“Tuir hau nia desizaun agora hela deit iha fulan hitu ami nia mandatu atu hotu maibe to’o agora ida ne’e hau sidauk iha hanoin ida atu afilia ba partidu ida,” hateten Deputadu de Jesus iha Parlamentu Nasional semana kotuk (1/12).
Deputadu Mateus hatutan katak iha posibilidade atu tama partidu ruma maibe ninia kondisaun la diak tanba sei moras.
“Hau nia kondisaun hela nafatin hanesan ne’e, trata lai hau nia kondisaun para hau nia kondisaun diak. Karik iha 2017 hanesan ne’e mak foin bele hanoin ba partidu mak bele tama.”
Nia esplika katak nia sai husi partidu PUN tanba desizaun individual nia halo maibe nia kontinua nafatin halao knar hodi servi povu.
‘’Tanba ne’e mak partidu hasai hau husi partidu, maibe iha momentu ida ne’e hau sidauk iha hanoin ida atu afilia ba partidu ida,” hateten Deputadu de Jesus.
Entertantu Deputadu Domingos Mesquita, PUN, katak depois Deputadu Mateus de Jesus simu tiha Kareta Parlamentu nian kontra PUN nia linha hanoin nune duni partidu desidi kedas nia laos deputadu bankda Partidu PUN ona.
“Maske iha lei katak ita labele troka, purtantu nia bele nafatin pozisaun hanesan Deputadu Independent nebe la pretense ba bankada ida-idak,” dehan Deputadu Mesquita.
Tuir nia katak partidu PUN la kohi simu kareta ofisial Parlamentu Nasional nian tanba iha indikasaun oi-oin ba aprovisionamentu ba kareta sira ne’e nian.
“Tanba ita nia Lei la fo dalan ba atu troka Deputadu, tanba ne’e mak sai hanesan Deputadu Indepedenti ne’ebe la pertense ba bankada ida idak.”
Nia esplika katak wainhira Deputadu Mateus hakarak fila fali ba partidu PUN iha posibilidade maibe konforme desizaun husi partidu nian sei liu husi kongresu mak foin bele desidi.
“Maibe ita nia lei labandu katak, Deputadu bele sai Independenti, maibe ida ne’e laos Deputadu ida deit mak desidi maibe partidu mak sei desidi oinsa atu rekonsiliasaun deputadu Mateus,” nia dehan.
