Relasiona ho selebrasaun Loron Mundial ba Direitus Humanus ne’ebe monu iha dia 10 de Dezembru, governu Timor–Leste entrega premiu Direitus Humanus Sergio Veira de Mello hodi rekonhese kontribuisaun no sakrifisiu ne’ebe Organizasaun Naun Governmental (ONG) ne’en ne’ebe implementa programas no aktividades hodi promove Direitus Humanus iha rai laran.
ONG ne’ebe simu Premiu Direitus Humanus Sergio Veira de Mello ba tinan 2011 mak Komisaun Nasional Luta hasoru HIV/SIDA (KNLHS), Organizasaun Kura Moras no Tohar, Orfonato São Domingos Savio Venilale, Orfonato São Francisco Asis Distritu Viqueque, Kongregasaun Escravas do Sagradu Coração de Jesus, no Centru de Estudu para Paz no Dezenvolvimentu (CEPAD).
“Tinan ida ne’e juri hili premiu lima husi kategoria Direitus Humanus: ekonomia, social no kulturais no ida kategoria direitus umanus sivil e politika. Tinan ida ne’e ita fo ba Reverendu Marçal no Organizasaun Esperansa ba sira nia servisu tau matan ba sira ne’ebe moris ho virus HIV. No liu husi Premiu Direitus Humanus Sergio Veira de Mello nudar Presidente da Republika hau hakarak rekonhese sira ne’ebe ho laran luak, sakrifisiu atu promove Direitus Humanus atu loron ba fali kalan, udan no bailoron, moris iha kiak no ki’ik sira nia let,” hateten Presidente da Republika, Dr. Jose Ramos Horta, iha nia diskursu durante Loron Mundial ba Direitus Humanus (10/12) iha Parlamentu Nasional, Dili.
President Horta hatutan katak Premiu Direitus Humanus ne’ebe kada tinan entrega kuaze 100 pursentu entrega ba ONG sira ne’ebe servisu ho aileba no oan kiak sira.
Iha parte seluk premiadu ba Premiu Direitus Humanus Sergio Veira de Mello, Reverendu Daniel Marçal nudar mos assesor ba KNLHS hato’o nia sentimentu katak sente orguilho tebes ba Estado tanba Estado hatudu duni ona katak sei la husik povu sira ne’ebe moris ho HIV/SIDA.
“Hau sente orguilho ho premiu ida ne’e no premiu ne’e sai motivasaun ida ba hau atu servisu makas hodi proteje Direitus Umanus liu-liu ba maluk sira ne’ebe moris ho HIV/SIDA oras ne’e hetan diskriminasaun makas hosi komunidade no familia sira tanba falta kuinhesimentu,” dehan Premiadu Reverendu Marçal iha nia diskursu.
Iha okaziaun ne’e Reverendu Marçal apelu mos ba komunidade sira hotu atu labele tan halo diskriminasaun ba ema ne’ebe moris ho HIV/SIDA tanba ema sira ne’e mos iha Direitus hanesan ema seluk nudar ema humanus ida.
Nia mos hatoo lia menon no ba maluk sira ne’ebe moris ho virus HIV/SIDA atu keta laran triste tanba nasaun Timor-Leste fo atensaun makas hela ba sira liu husi premiu ne’ebe nia simu no katak ne’e hatudu katak sira sei la moris mesak maibe nasaun sei moris ho sira.
Iha fatin hanesan, Mario Alves husi CEPAD hateten katak premiu ne’ebe sira hetan ne’e hanesan onra bo’ot ida ba CEPAD tanba hatudu katak Estado Timor-Leste rekonhese duni servisu nee’be CEPAD halo durante ne’e.
“Ho Premiu ne’e ami sei esforsu makas atu kontinua halo servisu ne’ebe ami iha liu-liu focus grupo diskusaun iha Timor laran tomak atu bele ajuda demokrasia no dezenvolvimentu iha Timor,” dehan Premiadu Alves, reprezenta CEPAD.
