Hare ba realidade ne’ebe iha rai laran hatudu katak labarik ho kondisaun defisiente barak mak laiha direitu atu asesu ba edukasaun ne’ebe maximu, Bankada Parlamentar Partidu Sosial Demokrata (PSD) ezijii ba Governu Timor-Leste atu harii eskola especial ba defisiente sira nune’e sira bele hetan direitu asesu ba edukasaun ne’ebe diak hanesan mos ho labarik seluk.
“Ami bankada parlamentar PSD eziji ba governu atu harii eskola ida ba labarik defisiente sira tanba dala barak labarik sira ne’ebe ho kondisaun defisiente hanesan matan aat, ai no liman aat labele halimar livre iha eskola ema ho kondisaun normal nian tanba hetan trosa husi labarik sira ne’ebe ho kondisaun normal. Entau sira sente katak sira labele moris iha bairro ne’ebe normal entau desizaun ne’ebe sira fotin mak para eskola ne’e konsidera katak direitu atu hetan edukasaun laiha,” dehan Deputada Maria Paixão, PSD, durante selebrasaun loron Direitus Umanus iha Parlamentu Nasional, Dili, iha loron 10 Dezembru foin daudauk.
Deputada Paixao katak labarik ho kondisaun defisiente sira tuir eskola kahur malu ho labarik seluk entau labarik seluk ne’ebe ho kondisaun normal bele trosa hodi bolu labarik defisiente sira katak matan delek, tilun diuk entau sira moe no la ba eskola.
Relasiona ho loron mundial ba Direitus Umanus Bankada Parlamentar Partido PSD apela ba governu ne’e, se labele realize, ba governu ne’ebe sei ukun mai, atu harii eskola ida ba defisiente sira liu-liu labarik sira komesa ho eskola bazika to’o sekundaria para bele fo didiak direitu ba sira atu hetan edukasaun ne’ebe maximu hanesan labarik sira seluk.
Iha fatin hanesan Deputada Ilda Maria da Conceição hateten katak agora dadaun iha ona Lei Ensino Rekorente ne’ebe inklui mos labarik ho kondisaun defisiente maibe governu seidauk implementa.
“Hau hanoin ida ne’e liu-liu Ministerio Edukasaun tenke hare tanba iha ona Lei Ensino Rekorente ne’ebe inklui ona sira ne’ebe ho kondisaun defisiente katak labarik sira ne’ebe ho kondisaun defisiente ne’e tenke harii mos fatin ne’ebe especial ba sira. Lei iha ona maibe governu seidauk implementa lei ne’e. Defisil atu tau matan ba labarik sira ho kondisaun defisiente, se iha ona entau ita bele tau matan ba sira,” dehan Deputada da Conceição.
