“Ba ami Direitus Humanus ba area Educasuan nian reflete iha curiulum Ensino baziko, no Ensino Secundario,” hateten Ministerio Freitas iha semana kotuk (9/12), iha Dili.
Tuir Ministro Freitas estudantes ensino baziko estuda kona ba sidadania Timor-Leste nian hosi aspetu Direitus Humanus iha materia disiplinas no mos iha ensino secundario mos hanesan materia relasiona ho direitus humanus no mos kona ba educasaun sivika.
Ministro haktuir tan katak iha mos iha Universidade Nasional Timor-Lorosa’e, UNTL, iha Fakuldade Direitu ne’ebe sira mos estuda kona ba direitus humanus nian.
Iha parte seluk Maria Filomena Babo Martins nudar Chefe Departamentu Treinamentu no Educasaun, hosi Sekretaria Estadu Promosaun Igualdade (SEPI) hateten katak partisipasaun feto iha setor educasaun nian sei menus.
“Hau hare partisipasaun feto iha escola, liu liu husi ensino baziko to’o ensino secundario barak mak partisipa maibe to’o iha ensino superior menus,” hateten Chefe Martins.
Entaun ida ne’e hanesan dalan ida ne’ebe impede feto tanba feto mos iha nia direitus humanus ba ensino superior.
Entertantu tuir joven feto ida ne’ebe la kohi hateten nia naran katak koalia kona ba direitus humanus iha area Educasaun nian iha Timor-Leste seidauk iha dezenvolvimentu.
“Dala ruma inan aman iha uma laran fo liu oportunidade ba oan mane mak bele kontinua escola iha ensino superior oan feto laiha direitu atu bele kontinua,” nia hateten.
Nia haktuir tan katak tuir konstituisaun feto ho mane iha direitu hanesan atu bele asesu ba educasaun maibe realidade ne’ebe iha Timor akontese inan-aman iha uma laran fo liu oportunidade ba oan mane mak bele kontinua escola iha ensino superior oan feto laiha direitu atu bele kontinua ida ne’e mos sai hanesan violasaun direitus humanus nian.
