“FRETILIN ninia pozisaun klaru, la konkorda politika ida ne’ebe hakarak deve,” hateten Deputadu bankada FRETILIN, Inacio Moreira, iha PN semana kotuk (1/12).
Deputado Moreira dehan nudar bankada opojisaun sei koalia makas konaba politika Governu Aliansa Maioria Parlamentar (AMP) hakarak deve osan.
“Ita kuandu deve ema nia sasan, ne’e dehan hanesan dividas nebe sei husik hela ba ita rasik no mos ba jerasaun nebe mai tuir.”
Deputado Moreira haktuir tan katak politika Governu AMP nia hakarak deve tanba inkapasidade halo planu.
“Ita nia osan fundu Minarai nian iha, iha neba lei la bandu para halo investimentu.”
Entertantu deputadu independenti, Mateus de Jesus katak, deve ne’e buat diak ida tanba depois tinan sanulu mai mak selu.
“Ita nia osan ne’ebe rai hela iha fundus mina nian funan lao hela. Se ita foti tiha osan minarai mai uza tiha signifika funan la iha ona,” hateten Deputadu Mateus.
Nia hateten tan katak maske mandato Governu AMP nian besik remata ona maibe prosesu dezenvolvimentu kontinua lao nafatin.
Tuir planu Governu nian, Estadu atu deve ossan hosi rai liur ho montante US$33.1 miloens.
“Osan ne’e atu halo ba estarada, husi iha ne’e ba to’o iha Liquisa ninian, husi Manatutu to’o Natarbora ninian, depois Maubisi, Same ba to’o iha Ainaro, halo estrada nebe ho kualidade,” Deputado Mateus hateten.
Iha lidun seluk Deputadu Mario Viegas Carascalao mos konkorda ho politika governu atu empresta ossan no sublina katak Estadu Timor-Leste matenek halo deve osan tanba nune la gasta Timor-Leste nia osan. “Selu mos selu Minarai nia funan, laos selu osan Minarai.”
Deputado Carrascalao haututan tan katak wainhira hasai bebeik osan hosi fundus minarai osan sei mohu. “Durante tinan sanulu ita la selu buat ida, depois tinan tolu nulu mak ita foin selu hotu. Tanba osan ne’e tau iha banku nia funan naton mak ita foin selu tusan ne’e.”
Tuir Deputado ne’e mos ossan ho montante US$33.1 milloens sei empresta hosi Banku Mundial, Asian Development Bank, Jika, no mos impresta husi banku China.
