Durante tinan sanulu resin povu Timor-Leste moris iha nakukun laran maibe ho esforsu bo’ot Governu Timor–Leste hahu ona koko oferese elektrisidade ba povu tomak iha rai laran maske seiduak funsiona hotu maibe tempu mos to’o ona atu povu labele uza eletrisidade ho gratuita (la selu) maibe povu tenke iha konsensia atu kontribui liu husi selu tarifa elektrisidade ne’ebe sira uza.
“Ita hotu tenke hanoin liu-liu bo’ot sira hanesan emprezariu sira ne’ebe iha vensimentu diak atu selu maibe ita hotu-hotu tenke selu tanba atu Estado fo servisu oioin ba povu tenke iha impostu. Ita hotu tenke kontribui katak Estado fo elektrisidade ita tenke fo osan oituan para selu gasoline. Tenke tau kakutak tanba tempu to’o ona ita hotu simu responsabilidade,” hateten Prezidente da Republika Jose Ramos Horta, semana kotuk (28/11) iha Palasio Pezidensial Aitarak Laran, Dili.
Nia hatutan katak projetu enerjia elektrisidade ne’e sei funsiona hotu iha 2012 karik sei iha failansu barak tanba buat ne’ebe foun foin koko sei hetan difiuldade oioin.
Iha parte seluk Sekretario Jeral Partido FRETILIN, Marii Alkatiri, hateten konkorda ho desizaun ne’ebe Presidente Ramos Horta deside katak ema hotu tenke kontribui ba dezenvolvimentu nasaun nian.
“Saida mak sira halo los hau la kritika nune’e duni hakarak elektrisidade tama iha uma tenke selu duni, bele halo negosiasaun ho governu atu selu maibe mak ne’e buat ruma uza tenke selu,” dehan SJ FRETILIN Alkatiri.
Iha lidun seluk mos Deputadu Adriano do Nasimento, PD, hateten katak apelu ne’ebe Presidente Ramos Horta halo fo mutivasaun ba povu atu hatoman aan iha mentalidade ne’ebe atu servi nasaun no oinsa atu harii konsiensia povu nian atu respeito ba obra ne’ebe nia valor aas tebes.
“Presidente apela para ita hotu kumpri tamba nia kustu karun tebes iha fulan ida nia laran bele consume US$1 Milhoens no hau hanoin hanesan nasaun foun Presidente iha duni obrigasaun atu apela ba povu.”
Nia hatutan katak povu barak laiha kapasidade atu selu maibe governu iha ona politika ida katak iha standard ida povu hetan naroman maibe so naroman deit, alende naroman uza tan seluk hanesan Jelera, TV no seluk tan ne’e tenke selu.
Iha oportunidade hanesan Sekretario Jeral CNRT, Deonizio Babo, hateten katak nia parte sente kontente tebes rona Presidente Ramos Horta apelu ba povu tenke kontribui ba dezenvolvimentu nasaun nian tanba iha rai ne’ebe deit povu tenke kontribui.
“Ami CNRT sei eziji ba povu tenke iha konsiensia atu kontribui ba dezenvolvimentu nasaun nian tanba Estado labele selu mesak. Se ita hatene uza deit se mak iha osan atu hola gazolina. Tempu to’o ona povu atu kontribui ba dezenvolvimentu nasaun ida ne’e nian,” hateten SJ Babo.
