Prezidente ba Republika Jose Ramos Horta hateten katak tenki hadia programa Bikan Ida Loron Ida ka Programa Merenda Eskolar ba labarik escola oan sira iha Timor-Leste tamba oras ne’e dadaun programa ne’e ladun lao ho diak.
Tuir Prezidente Horta ossan governu uza atu implementa programa Merenda Eskolar iha rai osan ki’k liu no karik governu la iha forsa atu implementa ho diak tenki entregar servisu fo han ka programa Merenda Eskolar ba Organizasaun Naun Govermentais (ONG) hanesan Care ka Oxfam ou karik ajensia ONU hanesan UNICEF (United Nations Children Fund) ka ba WFP (World Food Programme).
Entertantu tuir Director Nasional Aksaun Sosial Escolar, Ministerio Edukasaun (ME), Carlito Mota, hateten katak atu programa ne’e lao diak tenki hakiak uluk kondisun diak selai sei a’at hanesan agora no tuir PR Horta refere.
“Ida ne’e pontu reflesaun ba ema hotu. Se prezidente koalia ne’e los maibe atu estabelese programa Merenda Escola ne’e Prezidente rasik la husu ba ema sira ne’ebe atu implementa programa merenda escolar ne’e,” hateten Director Mota.
Tuir Diretor Mota katak momentu atu estabelese programa ne’e la husu ba implementador sira katak kondisaun saida mak sira kria ona atu nune’e programa ne’e bele lao ho diak.
Nia haktuir tan katak programa atu diak parseiru hotu ne’ebe hola parte iha programa ne’e tenki iha servisu hamutuk no labele hein deit ba Educasaun mak implementa programa ida ne’e.
Parseiru ne’ebe mak tur hamutuk asina akordu atu implementa programa Merenda Eskolar iha rai laran mak Ministerio Agrikultura e Pescas, Ministerio Saude, ho tan Ajensia Internasional sira hanesan UNICEF no WFP.
Nia hateten tan katal bainhira programa Merenda Eskolar ne’e lao la diak Ministerio sira seluk ema la temi temi mak Ministerio Educasaun mak lori todan hela deit.
