Reprezentantes feto hosi partidus politikus 18 hosi partidus 22 ne’ebe rejistu atu tuir Eleisaun Jeral iha 2012 hamutuk ho Sekretaria Estado Promosaun Igualdade (SEPI) no Organizasaun Sosiedade Sivil sira ne’ebe durante ne’e esforsu makas atu motiva organizasaun feto involve aan iha vida politika assina plataforma politika kona ba Feto iha Vida Politika.
“Ohin ita hotu akompanha katak SEPI halo progresu ida atu prepara feto maluk sira ne’ebe involve aan iha partidus politikus, liu-liu 22 partidus politikus. Balun la marka prezensa maibe sira iha komitmentu katak sira hotu aseita ho esbosu final ne’ebe SEPI realize,” dehan SE Idelta Maria Rodrigues, foin dadauk (22/11) iha Salao Delta Nova, Comoro, iha Dili.
SE Rodrigues informa katak feto politika ne’ebe hola parte iha partidus politikus iha obrigasaun atu halu mudansa no infuensia partidus politikus sira iha area igualidade jeneru no katak labele asina plataforma politika ne’eb no ba rai nonok deit.
“Hau espera katak ho asinatura plataforma feto iha politika bele aumenta no fo kbi’it liu tan ba feto sira iha partidus politikus sira atu luta nafatin ba dezigualidade ne’ebe pais ida ne’e infrenta no feto hotu esforsu atu koko halo infuensia ba partidus politikus sira hotu ba area igualidade jeneru.”
Plataforma politika kona ba feto iha politika ne’ebe asina husi feto hosi partidus politikus 18 ne’e sei uza iha kampania presidensial no legislative tinan 2012 ba iha area Feto iha Edukasaun, Feto iha Ekonomia, Feto iha Saúde, Feto iha Kultura, Feto iha Justisa, Feto iha Politika no Feto iha Media.
Iha parte seluk organizasaun Mulher Partidu CNRT, Bendita Monis magno hateten katak plata forma ne’e importante tebes ba organizasaun feto politika sira atu bele implementa area ne’ebe hakerek ona iha plataforma ne’e nia laran iha baze, liu-liu iha partidu laran rasik.
“Hau hanoin plataforma ne’e sai hanesan livru ida ba mi atu bele halo implementasaun iha baze liu-liu militante partidu CNRT no partidu CNRT prontu atu servisu ho organizasaun ne’ebe deit luta ba desigualidade iha rai laran katak ita tenke hamutuk hodi alkansa ita nia vitoria iha 2012,” hateten Reprezentante Monis.
Iha fatin hanesan reprezentante Organizasaun Mulher Partidu Frente Mudansa, Dina Pires, hateten katak partidu Frente Mudansa iha ona kandidata feto ba Elisaun Presidensial 2012.
“Sim ami iha ona kandidatura atu ba partisipa iha elisaun presidensial 2012 nian maibe ami seidauk bele fo sai se mak ba compete no ami husi feto partidu Frente Mudansa prontu atu implementa programa iha tinan 2012 mai,” dehan Reprezentante Pires.
