Hare ba realidade ne’ebe hatudu katak komunidade sei kontinua tesi ai no soe foer arbiru maske iha ona avisu katak labele soe foer no tesi ai arbiru tanba bele fo inpaktu ba dezenvolvimentu nasaun, Prezidente da Republika Jose Ramos Horta fo kulpa ba joventude sira ho razaun katak joventude mak tenke kontribui makas hodi halo protesaun ba hahalok sira ne’e.
“Iha ne’e hau hakarak kritika joven sira, joven sira mak devia [tuir los] kontribui makas atu halo limpeza iha ida-idak nia Aldeia no Suku atu labele soe foer oioin iha mota laran tanba foer sira ne’e bele oho ita nia ikan iha tasi bainhira udan mai,” dehan Presidente Ramos Horta semana kotuk iha servisu fatin iha Aitarak Laran, Dili.
Presidente Ramos Horta hatutan katak povu no joventude sira oras ne’e dadaun laiha sentimentu atu kuidadu ambiente no mensagen sira ne’ebe president fo sai beibeik liu husi televizaun katak hamoos idaidak nia bairo, sidade. “Maibe laiha ema ida rona no halo tuir.”
Iha parte seluk Presidente Conselho Nasional da Joventude de Timor-leste (CNJTL), Leovigildo da Costa Hornai, hatente katak nia parte simu kritika husi Presidente da Republika tanba kritika ne’e hanesan atu eduka no informa ba povu liu-liu joventude sira iha teritorio tomak atu badinas halo aktividade social hanesan kuda ai oan no limpeza.
Maibe Prezidente CNJTL Hornai hatutan mos katak presiza hatene katak joven laiha autoridade tanba autoridade iha Chefe Suku, Chefe Aldeia, Administrador no Ministerio sira nia liman, se presiza involvimentu joven iha ne’eba presiza kordenasaun ne’ebe diak ho Konselho Joventude iha suku.
Iha parte seluk nia mos rekuinese katak iha duni aktividade barak mak joven la involve tanba falta kordenasaun entre lider local sira iha bairo entau hamosu problema.
Iha lidun seluk Joventude, Maria Carmelita, hateten katak joventude sempre fo kontribuisaun ba dezenvolvimentu nasaun nian hanesan limpeza maibe ema iha hanoin ne’ebe diferente tanba ne’e halo joven balun baruk atu limpeza.
“Dala barak ami [Joventude] halo limpeza maibe tamba ita ema iha hanoin ne’ebe la hanesan entau balun limpeza balun mos kontinua soe foer arbiru,” hateten Joventude Carmelita.
