Internet hanesan pontu importante ida ba joventude no estudantes sira tanba se laiha assessu ba internet sira la bele halo buat ida iha sira nia moris tanba agora dadaun informasaun hotu-hotu liu husi internet nunee’ mos Timor-Leste seiduak iha livru ne’ebe sufesiente ba estudantes sira atu bele estuda tanba ne’e internet bele responde dificuldade ne’ebe sira hasoru iha sira nia apredizajen.
“Hau agradese tebes ba Gabinete Presidente ne’ebe oferese ona internet gratuitu atu fasilita ami nia estudu. Iha internet café barak maibe ida ne’e la gasta osan entau hau aproveita tempu atu buka informasaun ne’ebe hau presiza iha hau nia estudu,” dehan estudante Universidade da Paz, João Domingos semana kotuk (29/11), iha Palasio Presidensial Nicolau Lobato, Aitarak Laran, Dili.
Estudante Domingos dehan tan katak teknolojia ne’e iha informasaun barak no material barak ne’ebe hetan iha ne’eba ne’eduni tenke aproveita tempu atu aprende.
“Ami kontente no agradese ba gabinete presidente ne’ebe oferese ona internet gratuitu ba ami estudantes atu buka informasaun ruma maibe iha dificuldade ida mak nia prosesu ne’e lao kleur los.”
Iha lidun seluk Joventude, Adão Barros hateten katak oportunidade ne’e inportante tebes ba joventude no estudantes sira tanba bele halo kama’an estudantes sira no bele hamenus estudantes sira nia osan ne’ebe selu ba iha internet café sira iha sidade laran.
“Hau nudar estudante universidade hato’o hau nia agradese ba presidente da republika ne’ebe iha ona hanoin diak atu hakama’an knaha todan ne’ebe estudantes sira iha liu husi oferese internet gratuita ba sira”dehan Joventude Barros.
Iha parte seluk presidente konselho nasional da joventude Timor-Leste (CNJTL), Leovigildo da Costa Hornai hataten katak hanoin ida diak tebtebes tama bele fasilita ona joventude no estudantes sira iha area informasaun nasional no internasional tanba estudantes presiza duni tulun ne’e.
“Ita hein katak aktividade ne’e labele konsentra deit iha Palasio Presidente maibe bele tau mos iha fatin publiku ruma hanesan universidade para ema hotu-hotu no estudantes sira bele livre asesu ba internet gratuitu ne’e mak inportante.”
