Konstituisaun ka Lei Inan tane ema hotu iha Timor-Leste nia moris maibe tenki iha mos politika kompaixaun ne’ebe bele hamenus terus loron loron ba sira ne’ebe moris iha mukit nia laran liu husi tau orsamentu no kondisoens seluk atu bele fo tulun ba sira.
“Hau ata sempre apoia orsamentu estadu ne’ebe fo atensaun ba ema ne’ebe moris iha mukit nia laran liu husi transparensia osan ba ema katuas sira, grupo vuneraveis, feto faluk sira, oan kiak sira, sira ne’ebe fisikamente ka mentalmente iha problema, ita nia veteranus Aswain, no vitima sira ,” hateten Prezidente da Republica (PR) Jose Ramos Horta isemana kotuk (28/11), iha Palasio Prezidente, iha Aitarak Laran, Dili.
Tuir PR Ramos Horta presiza halo liu tan atu hasae ema ne’ebe mukit husi siklo extrema pobreza maibe atu bele atinji objektivu ne’e tenki tetu didiak planu no hili saida los mak hakarak no presiza halo.
“Hau ho laran ksolok katak ita nia governo no Parlamentu mos hanoin hanesan lori adopta politikas no orsamentu ne’ebe bele fo tulunba ita nia maun alin sira ne’ebe la dun iha sorte iha ita nia rai,” hateten Prezidente Ramos Horta.
Entertantu tuir matenek nain Magdalena Sepulveda, hosi Nasoens Unidas (ONU) ne’ebe foin daudauk vizita Timor-Leste, hateten katak krize ekonomia no finanseiru global inklui mos eskluzaun sosial no kultura politico mak halo Timoroan sei moris iha kiak nia laran.
“Ema riko liu hotu sira iha sosiedade Timor-Leste nian goza rikosoin kuaze dala 10 pursentu bo’ot liu fali kiak liu hotu,” hateten matenek nain ONU Sepulveda.
Nia hatutan katak maske iha ona progresu iha redusaun pobreza, ema kiak sei presiza nafatin esforsu bo’ot hodi hametin kresimentu nasional ne’ebe fo benefisio ba ema kiak sira hotu liu-liu sira ne’ebe hela iha area rurais.
