Relasiona ho rekomendasaun ne’ebe Fundasaun Mahein (FM) hato’o ba institusaun Forsa Seguransa Polisia Nasional Timor-Leste, PNTL, atu limita uza forsa hodi hasoru krimi ki’ik atu nune bele minimiza violasaun Direitu Humanos hasoru komunidade, Komandante Operasional Eugenio Pereira semana kotuk (15/11) iha Kuartel Jeral PNTL iha Caicoli, Dil, hateten ida ne’e depende ba situasaun.
Se karik durante poilisia tun ba tereno atu atende situasaun ruma hare katak nia a’an la iha ameasas, ho ema seluk nia vida la iha ameasas entau ida ne’e la presiza uza forsa. Mas karik iha nia intervensaun hare katak primeiru ninia prezensa sente ameasadu no ema seluk nia vida iha ameasas ruma ka sai hanesan perigu ba nia moris, entaun iha situasaun ne’e tenki uza forsa para hodi hapara ka minimiza imptaku ameasa.
“Hau hanoin ida ne’e presiza duni, ema seluk ne’ebe nia sente nia vida ameasadu; ida ne’e presiza duni atu uza forsa. Se kuando ema seluk nia vida sente ameasadu ida ne’e presiza duni uza forsa,” hateten Komandante Operasional Pereira.
Tuir Komandante ne’e katak operasaun PNTL nian elementus halao iha Sub-distritu Suai, Distritu Covalima, no operasaun 88 iha Sub-Distritu Queliqai, Distritu Baucau, situasaun rua ne’e hanesan krime bo’ot tamba fo ameasa ba ema nia vida.
Entertantu Director FM, Nelson Belo, hateten katak fundasaun la konkorda ho politika Komando PNTL ne’ebe durante ne’e uza meus operasaun hodi halo atuasaun ba kualker tipo de problema.
“Fundasaun Mahein senti katak meus operasaun ne’e hamosu tensaun paniku iha komunidade bainhira hare prezensa membru Polisi Nasional Timor-Leste uza kilat bo’ot no faraad verde,” hateten Director Belo.
Director ne’e hatutan tan katak pior liu tan ho meus operasaun dala barak hamosu fila fali violasaun Direitus Humanus durante periodo operasaun nian.
FY rekomenda atu iha future tenki limita uza forsa hodi hasoru krimi ki’ik atu minimiza violasun Direitus Humanus hasoru komunidade.
