Orsamentu Jeral Estadu 2012 ba Defeza no Seguransa aprova ona hosi Parlamentu Nasional, Dili, semana kotuk (17/11), ho montante milhoens $64,082 ba areas rua ne’e.
Tuir Deputadu Duarte Nu nes montante ne’e presiza duni atu responde ba nesesidade Polisia Nasional Timor-Leste (PNTL ) no Forsa Defesa Timor-Leste (F-FDTL) hodi halao sira nia servisu diak liu tan iha tempo oin mai no bainhira halao Eleisaun Jeral 2012.
“Para garante duni seguransa ho nune’e povu laiha ona preokupasaun kona ba kestao seguransa iha rai laran.”
Iha parte seluk Deputadu Paulo De Fatima Martins hateten katak total orasmentu ne’ebe aloka sufisiente ona ba polisia sira atu nune’e sira bele halo sira nia servisu sai diak liu tan iha tinan foun.
“Orsamentu ne’ebe iha ne’e hodi hola kareta, ekipamentu informatika, ekipamentus seguransa no mos radio komunikasaun tamba dala barak ona ita hare ekipamentus sira ne’e iha seguransa limitadu tebes,” hateten Deputadu Martins.
