Maske Presidente da Republika Jose Ramos Horta deklara Dili nudar Cidade paz, agora dadaun kapital laran foer mak domina tanba komunidade balun la iha konsensia atu utiliza fatin lixu ne’ebe governu oferese ona iha bairo-bairo.
“Hau hirus tebtebes imi nia apa, ama sira no imi mos hau hirus tanba hau hatete dalabarak ona no Amu Bispo mos hatete beibeik ona, Dili laran foer tebtebes tanba imi nia apa, ama no imi rasik la hamos imi nia kintal. Jardin foer barak los,” dehan PR Horta iha nia diskursu selebrasaun Loron Labarik iha katedral Dili, foin lalais (20/11).
Presidente Ramos Horta hatutan tan katak komunidade sira finzi tilun diuk bainhira rona mensagen ruma husi Bispo sira no Presidente rasik kontinua soe foer arbiru halo sidade foer tebtebes.
“Foer hamosu moras oioin tanba hakiak susuk depois imi moras ba ospital estadu gasta osan lubuk ida.”
