Relasiona ho selebrasaun loron Konvensaun Direitu Labarik ba dala 22 no Loron Mundial ba Harohan no Asaun ba Labarik ne’ebe selebra iha loron 20 de Novebru taka ho missa harohan no assaun ba labarik ne’ebe diriji husi Amu Bispo Dioceze Dili, Bispo Dom Aberto Ricards da Silva.
Liu hosi selebra Missa ida ne’e inan-aman sira bele halo reflesaun katak labarik iha direitu tomak ba nasaun foun ida ne’e.
“Bebe ka labarik oan mak esperansa ukun nasaun nian. Sira mak sei hametin unidade no harii paz iha nasaun ida ne’e. No sira mak sei ukun povu iha nasaun ida ne’e. Sira mak sei dezenvolve nasaun iha mundu tomak,” dehan Bispo D. Ricardo da Silva, durante homelia missa Loron Harohan no foti accao ba labarik selebra iha Igreja Katetral Dili foin lalais ne’e (20/11).
Bispo hatutan katak inan-aman sira tenke respeitu no hadomi Grasa ne’ebe Nai Maromak fo ba sira ho pasensia, solok no domin labele halo deskriminasaun ba labarik sira tanba aksaun violensia hasoru labarik ne’e krime bo’ot tebes. Nia apela atu inan-aman kuidadu labarik sira didiak no eduka sira tanba sira mak esperansa nasaun nian.
Iha fatin hanesan Komisaria Komisaun Direitu Labarik (KNDL) hateten katak aktividade ne’ebe Komisaun halao durante loron tolu hanesan vizita joven sira iha prizaun no labarik aleijzadu no aktividade ikus mak taka ho missa harohan no foti assaun ba labarik ne’ebe diriji husi Bispo Dom Ricardo atu dada komunidade no governu sira nia atensaun ba labarik sira nia direitu nune’e bele minimiza violensia hasoru labarik ne’ebe sei makas iha Timor-Leste.
Iha lidun seluk Vise Prezidente Parlamentu Nasional, Maria Paixao, hateten katak Loron Labarik nian inportante tebes atu fo atensaun ba labarik sira no ba oin tenke halo ona assaun ruma ba sira nia direitu.
Iha oportunidade ne’e Deputada Paixao mos nota katak la iha partisipa husi parte governu.
“Hau lamenta tebes tanba laiha prezensa husi bo’ot sira iha serimonia ne’e no lamentasaun barbarak mak ohin labarik sira hato’o ona laos deit lamentasaun maibe sira mos halo deklarasaun ba sira nia direitu ne’ebe importante tebe estado no governu tenke tau matan para labarik sira bele sente sira nia direitu ne’e diak liu tan ba oin” dehan deputada Paixao.
