Ministerio Saúde halao enkontru ho representativus oin-oin atu deskute kona ba planu estratejiku ba Institutu Nasional Saúde Timor-Leste iha Comoro, Dili, seman kotuk (14/11).
Esbosu planu ne’e dezenvolve ho apoiu husi United Nations Children’s Fund (UNICEF).
Institutu Nasional Saúde hetan mandatu atu halao pre-Formasaun ba rekursu umanu relasionadu atu nune’e sistema asistensia saúde iha Timor-Leste bele funsiona efetivu liu tan. Planu ne’e nia vizaun mak atu halo Institutu Nasional Saúde hanesan sentru ida hodi ajuda atinji alvu sira iha planu estratejiku nasional Sector Saúde nian.
“UNICEF sente orgullu tebes hodi hetan konvite husi Ministeriu Saúde atu fo apoiu tekniku ba dezenvovimentu planu estratejiku ba institutu ne’e. UNICEF nia kontribuisaun ne’e hanesan parte komitmentu ida hodi apoia parseiru sira nia kapasidade atu realiza labarik no feto sira nia direitu. Hau kontete katak UNICEF nia peritu internasional sira, iha supervizaun husi seksaun saúde nian halo konsulta ativamente ho ajente sira Ministerio Saúde hotu ba sujestaun hirak valiozu hodi dezenvolve esbosu planu ne’e,” dehan Sra. Hongwei Goa, Reprezentantiva UNICEF iha Timor-Leste.
Iha parte seluk , Director Geral Ministerio Saúde, Agapito Da Silva Soares hateten katak UNICEF fo apoiu ba Institutu Nasional Saúde planu estratejiku ba tinan lima tanba UNICEF mos kolabora iha prosesu eraborasaun planu Ministeriu Saude ba tinan lima nian ne’e. Iha eventu ne’e mos iha diskusaun planu Institutu Nasional Saúde katak aktividade saida mak sei halo durante tinan lima.
“Ita halo workshop ne’e atu husu parseiru no ema hotu-hotu nia hanoin oinsa bele elabora planu ne’e bele responde politika Ministerio Saúde nian atu kapasita ita nia profesionalsaúde hodi nune’e sira bele iha kualidade ne’ebe diak ba atendimentu lor-loron” dehan Director Jeral Soares.
