Tuir Deputada Carmelita Moniz, CNRT, iha Parnalamentu Nasional Semana Kotuk (11/11) Timor Telcom (TT) presiza halo kordenasaun didiak ho Governu Timor-Leste molok no durante dada fiu Fibra Optika atu fasilita telekomunikasons iha rai laran.
“Hau husu ba Timor Telekom atu halo kordenasaun didiak ho Governu atu nune’e bele fasilita ita hot-hotu nia nesesidade hanesan telekomunikasaun,” hateten Deputada Moniz.
Deputada Moniz mos preokupa tanba fibra optika atu dada liu husi airin, la os ke ba rai okos, ida ne’e bele amiasa ema nia vida, tanba fibra optika nudar material ida ne’ebe kiik maibe waihira kona ema bele mate kedas.
Nune’e mos Prezidente Parlamentu Nasional, Fernando La Sama de Araujo, preokupa tebes ho kualidae telekomunikasoens liu-liu hosi rai liur mai iha rai laran.
“Hau dala barak hau iha Indonezia telefone mai Timor ne’e problema teb-tebes. Ne’ebe hau la hatene saida mak Timor Telekom halo. Husi ne’eba telfone mai la bele so husi ne’e mak telfone ba mak bele,” PN Prezidente Lasama hateten.
Presizente Parlamentu hatutan tan katak Timoroan nia oan no beioan barak mak agora iha Indonezia maibe no karik sira persiza telephone mai Timor susar teb-tebes. “So ita mak tenki telfone ba sira.”
Hatan ba kestaun hirak ne’e Ministru Infraestrutura Pedro Lay hateten katak oras ne’e dadaun Governu hare ona ba asuntu ne’e ho Timor Telekom tanba sira hadia dadaun ona sistema telekomunikasoens.
“Governu hare ona ba buat hirak ne’e atu nune’e bele hadia telekomunikasaun ne’ebe mak diak,” hateten Ministru Lay.
